حجاج کرام کے بارھویں قافلے کی شہر واپسی
بنگلورو،20؍ستمبر(ایس او نیوز) سفر حج بیت اﷲ پر روانہ ہونے والے حجاج کرام کا بارھواں قافلہ آج صبح بنگلور انٹرنیشنل ایرپورٹ لوٹ آیا۔ مدینہ منورہ سے سعودی ایر لائنز کی فلائٹ ایس وی 5930 صبح 10-10بجے کیمپے گوڈا انٹرنیشنل ایرپورٹ پہنچی جس میں 296 حجاج کرام سوار تھے۔ ایرپورٹ پر حجاج کرام کی آمد کے بعد ریاستی حج کمیٹی کے چیرمین ورکن اسمبلی جناب روشن بیگ نے ان کا استقبال کیا۔ ان تمام حجاج کرام نے مدینہ منورہ ایرپورٹ پر چیک ان لگیج کے دوران 598 بیاگ لگیج کے لئے دئے تھے، لیکن تکنیکی خرابی کے سبب صرف 406 بیاگ ہی بنگلور پہنچے ہیں ، باقی 192 بیاگوں جو 94حجاج کرام کے ہیں بنگلور نہیں پہنچے۔ فلائٹ کی آمد کے بعد جب لگیج کے بیاگ کنویر بیلٹ پر آنے لگے تو کافی دیر کے بعد بھی لگیج نہ ملنے پر حجاج کرام پریشان ہوئے تو فوری طور پر جناب روشن بیگ کی ہدایت پر سعودی ایر لائنز کے حکام سے رابطہ کیاگیا۔ اور ان لاپتہ بیگوں کے بارے میں دریافت کیاگیا، فوری طور پر سعودی ایر لائنز کے حکام نے مدینہ ایر پورٹ رابطہ کرنے کے بعد بتایاکہ 192 لگیج بیاگوں تکنیکی خرابی کے سبب مدینہ ایرپورٹ پر ہی رہ گئے ہیں ، جلد از جلد انہیں بنگلور لاکر حجاج کرام کے ٹھکانوں تک سعودی ایر لائنز کی طرف سے ہی پہنچائے جائیں گے۔ ریاستی حج کمیٹی کے نوڈل افسر سید اعجاز احمد نے بتایاکہ دوتین دنوں تک اس لگیج کے بنگلور لوٹنے کی توقع ہے۔