حج درخواست فارموں کا داخلہ 15؍ نومبر سے 7؍ دسمبر تک:حج کمیٹی آف انڈیا
بنگلورو،13؍نومبر(ایس او نیوز) 2018 کے سفر حج بیت اﷲ کیلئے مرکزی حج کمیٹی کے ذریعہ روان ہونے کے خواہشمند حضرات 15؍ نومبر سے اپنی درخواستیں جمع کرسکتے ہیں۔ کل مرکزی وزارت اقلیتی امور اور حج کمیٹی آف انڈیا کی طرف سے 2018ء کے حج پروگرام کے اعلان کے بعد ریاست میں بھی حج کے پروگرام کی تکمیل کی تیاریاں تقریباً مکمل کرلی گئی ہیں۔ کرناٹکا اسٹیٹ حج کمیٹی کے نوڈل آفیسر سید اعجاز احمد نے ایک اخباری بیان میں اطلاع دی ہے کہ 15 ؍ نومبر سے دفتر ریاستی حج کمیٹی نمبر 84Aرچمنڈ روڈ بنگلور 25- میں مفت تقسیم کئے جائیں گے یا پھر ان فارمس کو حج کمیٹی آف انڈیا کی ویب سائٹ سے بھی ڈاؤن لوڈ کئے جاسکتے ہیں۔ پر شدہ فارمس 15؍ نومبر سے 7؍ دسمبر 2017 تک حج کمیٹی دفتر میں جمع کرائے جاسکتے ہیں۔ اس کے علاوہ حج کمیٹی کی ویب سائٹ پر درخواست فارمس آن لائن بھی جمع کرائے جاسکتے ہیں۔ انہوں نے عازمین حج سے درخواست کی ہے کہ فارم پر کرنے سے پہلے تمام ضوابط غور سے پڑھ لیں۔ ان ضوابط کے مطابق فارم پر کرکے جمع کریں۔ انہوں نے عازمین سے گذارش کی ہے کہ وہ قربانی کے کوپنس حاصل کرنے پر زیادہ توجہ دیں ، کیونکہ اکثردیکھا گیا ہے کہ عازمین اپنا سفر شروع کرنے سے پہلے قربانی کی سہولت کے انتخاب کو لے کر مباحثوں میں مبتلا ہوتے ہیں۔ آئندہ اس طرح کی صورت نہ رہے اسی لئے درخواستیں جمع کرتے وقت ہی اپنا فیصلہ کرلیں۔