جموں وکشمیرسے عازمین حج کاپہلا دستہ سعودی عرب روانہ
سرینگر،25؍جولائی(ایس او نیوز؍آئی این ایس انڈیا)جموں وکشمیرسے عازمین حج کاپہلا دستہ آج سعودی عرب روانہ ہو گیا۔ایک افسرنے بتایاکہ سری نگر سے مدینہ کی براہ راست پروازسے حج کرنے جا رہے ان مسافروں کووزیراعلیٰ محبوبہ مفتی اورحج اور اوقاف کے وزیرسیدفاروق ادرابی نے ہوائی اڈے سے روانہ کیا۔پہلاقافلہ420عازمینِ حج پرمشتمل ہے۔افسرنے کہا کہ آج ہی روانہ ہونے والی دوسری پرواز سے بھی اتنے ہی مسافر مقدس شہر مدینہ روانہ ہوں گے۔اس سال حج پر جانے کے لیے جموں وکشمیرسے 8100سے زیادہ مسافروں کومنتخب کیاگیاہے۔حج ستمبر کے پہلے ہفتے سے شروع ہو رہا ہے اوربقرعیدکے تہوارتک جاری رہے گا۔