کمار سوامی نے ترقی پرور بجٹ پیش کیا: وشواناتھ
بنگلورو، 9؍فروری (ایس او نیوز) ریاستی جے ڈی ایس صدر ایچ وشواناتھ نے کہا ہے کہ وزیر اعلیٰ ایچ ڈی کمارسوامی نے کل ریاستی اسمبلی میں جو بجٹ پیش کیا وہ ریاست کی ترقی وخوشحالی کو اور مستحکم کرنے کے لئے معاون ہوگا۔
اخباری نمائندوں سے بات چیت کرتے ہوئے وشواناتھ نے کہا کہ زرعی شعبے کی طرف وزیر اعلیٰ نے جس طرح کی توجہ دی ہے اس سے کسان طبقے کے حالات زندگی کو بہتر بنانے کے ساتھ ان کے قرضوں کی معافی میں بھی مدد ملے گی۔ اس کے علاوہ شعبۂ آبپاشی، تعلیم، صحت، دیہی ترقیات اور کمزور طبقوں کی فلاح وبہبود کی طرف بھی وزیراعلیٰ نے توجہ دے کر ایک ایسا متوازن بجٹ پیش کیا ہے جس کی ریاستی عوام کو اشد ضرورت تھی۔
انہوں نے کہاکہ اس بامعنی اور بامقصد بجٹ کی بدولت آنے والے دنوں میں ریاست کو ترقی کی جانب لے جانے کے ساتھ عوام کی فلاح وبہبود یقینی بنانے میں مدد ملے گی۔