بنگلورنارتھ حلقہ سے کانگریس ٹکٹ دی جائے ورنہ بنگلور سنٹرل سے آزاد امیدوار بن جاؤں گا: ایچ ٹی سانگلیانہ
بنگلورو،26؍مارچ (ایس او نیوز) بنگلورنارتھ لوک سبھا حلقہ سے مجھے کانگریس کی ٹکٹ دی جائے۔ پارٹی ہائی کمان اگر شام تک فیصلہ نہیں کرے گا تو آزاد امیدوار کے طورپر انتخابی میدان میں اتر جاؤں گا۔ یہ باتیں سابق رکن پارلیمان ایچ ٹی سانگلیانہ نے کانگریس قائدین کو انتباہ دیتے ہوئے کہیں۔ شہر کے پریس کلب میں پریس کانفرنس سے انہوں نے کہاکہ کانگریس پارٹی کے لئے انہوں نے بہت محنت کی ہے۔ جب بی جے پی ٹکٹ پر بنگلورسنٹرل سے منتخب ہواتھا تو اس وقت بھی میں نے عوام پرور بہت سارے کام کئے ہیں۔ ان خدمات پر توجہ دیتے ہوئے کانگریس پارٹی سے ٹکٹ ملنے کی امید تھی۔ بنگلور سنٹرل حلقہ سے امیدوار بننے کی خواہش تھی لیکن ٹکٹ مجھے نہیں دیاگیا اس سے مجھے اور میرے طبقہ عیسائیوں کو دلی تکلیف پہنچی ہے۔ کانگریس پارٹی نے اپنے حصہ کی 20؍سیٹوں میں سے ایک سیٹ بھی عیسائی طبقہ کے لئے نہیں چھوڑی۔ یہ انتہائی افسوس ودل آزاری کا مقام ہے۔ کانگریس کے لئے اب ایک موقع ہاتھ آیا ہے۔ جے ڈی ایس نے اپنے حصہ کی ایک سیٹ بنگلورنارتھ حلقہ کو کانگریس کے لئے چھوڑ دی ہے۔ کانگریس کے 21؍ویں حلقہ کی شکل میں بنگلور نارتھ سے مجھے ٹکٹ دیئے جانے کی قوی امید ہے۔ پارٹی کو چاہئے کہ وہ ایک موقع فراہم کرے۔ انہوں نے پارٹی قائدین سے بھی اس کا مطالبہ کیا ہے۔ بنگلور نارتھ سے امیدوار بننے والوں کی تعداد زیادہ ہے۔ میری خدمات کو مد نظر رکھتے ہوئے مجھے موقع فراہم کرنا چاہئے۔ اس حلقہ میں کانگریس پارٹی کا اثر ورسوخ ہے۔ کانگریس کے اراکین اسمبلی کا یہاں زور ہے۔ جس سے میری جیت آسان ہوسکتی ہے۔ اگر پارٹی اس حلقہ کے لئے امیدوار منتخب کرنے میں غلطی کرتی ہے تو پارٹی کو نقصان ہوسکتا ہے۔ میں آج اپنے طبقہ کے حامیوں کے ساتھ اجلاس چلاکر آئندہ کا فیصلہ کرنے والا ہوں۔ انہوں نے افسوس ظاہرکرتے ہوئے کہاکہ کانگریس نے بھی عیسائی طبقہ کو مکمل طور پر نظر انداز کردیا ہے۔ کرسچن کمیونٹی کو تمام سیاسی پارٹیوں نے بھلادیا ہے۔ کرناٹک سے مجھے اور نویدیتاالوا کو ٹکٹ ملنے کی امید تھی۔ قومی سطح پر بھی ہمارے قائدین کو ٹکٹ فراہم کرنے کی توقع تھی، لیکن یہ امید برنہیں آئی۔ اس لئے اس طبقہ کے تمام افراد مل بیٹھ کر ایک اجلاس کریں گے۔ اجلاس میں جو فیصلہ ہوگا اس پر عمل کروں گا۔ بنگلور نارتھ سے ٹکٹ ملتا ہے تو اچھی بات ہے ورنہ طبقہ کا دباؤ اور مطالبہ ہے کہ میں بنگلور سنٹرل حلقہ سے آزاد امیدوار کے طور پر انتخابی عمل میں حصہ لوں۔