وزیراعلیٰ کمارسوامی نے پہلی بار آپریشن کنول کا اعتراف کیا
میسورو،15؍جنوری(ایس او نیوز) ریاست کرناٹک میں آپریشن کنول سنکرانتی شروع ہوگئی ہے۔تہوار کے موقع پر صرف آپریشن کی باتیں چل رہی ہیں ۔
وزیراعلیٰ کمارسوامی نے آج پہلی بار اعتراف کیا کہ ریاست میں آپریشن کنول چلایاجارہاہے۔ بی جے پی والے کن کن اراکین اسمبلی سے رابطہ کئے ہوئے ہیں، ممبئی کے کس ہوٹل میں کس رکن اسمبلی کے نام پر روم بک ہوا ہے ،معلوم ہے ۔ ان اراکین اسمبلی کوخطیر رقم کا جو لالچ دیاجارہا ہے اس سے بھی واقف ہوں ۔
اخباری نمائندوں سے انہوں نے سوال کرتے ہوئے کہاکہ بی جے پی کے آپریشن کنول کے معاملہ میں آپ کو اب تک شک و شبہ کیوں ہے ۔ میں تمام حالات کو سنجیدگی سے دیکھ رہا ہوں اور مجھے یہ معلوم ہے کہ ان کی کوئی بھی کوشش رنگ لانے والی نہیں ہے۔ تین اراکین اسمبلی اپنے نجی کام کے سلسلہ میں ممبئی گئے ہوئے ہیں۔ وہ تینوں میرے رابطہ میں ہیں۔آج صبح بھی میں نے ان سے بات چیت کی ہے۔ ریاست میں صدر راج نافذ کے سلسلہ میں کئے گئے سوال پر جواب دیتے ہوئے کمارسوامی نے کہا کہ مجھے یہ معلوم کرنامشکل ہورہا ہے کہ ذرائع ابلاغ اس قسم کی من گھڑت باتوں کوخبریں بنا کر پیش کرنے میں کیوں دلچسپی دکھا رہا ہے۔ جھوٹی خبریں پھیلانے والوں کو کیا ملتا ہے معلوم نہیں۔ہماری حکومت مستحکم ہے ۔ اگر گرنے کی بھنک لگتی تو میں اتنا کول نہیں رہتا۔
سابق وزیراعلیٰ بی ایس ایڈی یورپا نے دہلی میں آج کمارسوامی پر الزام لگاتے ہوئے کہا کہ آپریشن کنول کا واویلا مچایا جارہا ہے جبکہ جے ڈی ایس خود بی جے پی اراکین اسمبلی کو خریدنے کی کوشش کررہی ہے ۔ اس پر ردعمل ظاہر کرتے ہوئے کمارسوامی نے کہا کہ اگر ثبوت ہو تو پیش کریں ۔حالانکہ آپریشن کنول ہونے کے سلسلہ میں کسی کو شک وشبہ نہیں ہے۔سابق وزیراعظم ایچ ڈی دیوے گوڈا اور ریاستی وزیر برائے تعمیرات عامہ ایچ ڈی ریونا پارٹی کے اراکین اسمبلی پر کڑی نظر رکھے ہوئے ہیں اور مسلسل ان سے رابطہ بنائے ہوئے ہیں تاکہ آپریشن کنول کاشکار ہونے سے اراکین اسمبلی کو بچایا جاسکے ۔