سیکولر جماعتیں سبق لیں،اتحادبہت ضروری ہے، سی پی آ ئی نے کہا،الیکشن اب ایک چھلاوابن کررہ گیاہے
نئی دہلی15مئی(ایس او نیوز؍آئی این ایس انڈیا) ہندوستانی کمیونسٹ پارٹی(سی پی آئی)نے کہاہے کہ کرناٹک اسمبلی انتخابات کے نتائج سے واضح ہوگیاہے کہ بھارتیہ جنتاپارٹی (بی جے پی)کو شکست دینے کے لیے تمام سیکولر سیاسی جماعتوں میں باہمی اتحادبہت ضروری ہے۔پارٹی کے جنرل سکریٹری سدھاکر ریڈی نے کرناٹک انتخابات کے نتائج کے بعداپنے ردعمل میں کہاہے کہ ان کی پارٹی بہت پہلے سے ہی کہتی رہی ہے کہ سیکولر جماعتوں کے درمیان اتحاد ضروری ہے اور کرناٹک کے نتائج سے اس کی ایک بار پھر تصدیق ہو گئی ہے۔انہوں نے یہاں ایک بیان میں کہا کہ کرناٹک میں ذات پات پر مبنی صف بندی کی وجہ سے ہی بی جے پی ابھری ہے اورانتخابات کے بعد سب سے بڑی پارٹی بنی ہے لیکن ریاست میں انتخابات میں کافی دولت کو بھی بہایا گیا ہے اور انتخاب اب چھلاوا بن کر رہ گیا ہے۔