صنعاء، 25اپریل(ایس او نیوز/آئی این ایس انڈیا)یمن کے وزیراعظم احمد عبید بن دغر نے باغیوں کے ہاتھوں تباہ ملک کی مالی معاونت کیحوالے سے خلیجی ممالک کی خدمات کو شاندار خراج تحسین پیش کیا ہے۔ ان کا کہنا ہے کہ جنگ زدہ یمن کی مالی امداد میں خلیجی ممالک سب سے آگے ہیں۔ جتنی مالی امداد خلیجی ریاستوں کی طرف سے کی گئی دوسرے ممالک کی طرف سے نہیں کی گئی۔ ملک کے عبوری دارالحکومت عدن میں خلیجی مماک کے سفیروں سے ملاقات کے دوران وزیر اعظم بن دغر نے کہا کہ یمنی عوام کی مالی مدد میں خلیجی ممالک اور شاہ سلمان ریلیف سینٹر سب سے آگے رہے ہیں۔ انسانی امداد کارروائیوں میں متحدہ عرب امارات کے ہلال احمر، کویت اور قطر کے امدادی ادارے بھی پیش پیش رہے۔یمنی وزیراعظم کا کہنا تھا کہ ملک میں باغیوں کے خلاف جاری آپریشن میں عرب ممالک نے خود کو جسد واحد کے طور پر تسلیم کرایا ہے۔ یمنی عوام خلیجی ملکوں کی انسانی امداد، صحت اور ریلیف کے شعبوں میں خدمات کو کبھی فراموش نہیں کریں گے۔ابن دغر نے کہا کہ معاصر تاریخ میں ہم ”یمن“ اور خلیجی ممالک حساس دور میں اتحادی بنے ہیں۔ موجودہ دور اقوام کی جغرافیائی سرحدوں کی حفاظت کے لیے ہم سے باہمی تعاون کے مزید فروغ کا تقاضا کرتا ہے۔ حالات کا تقاضا ہے کہ تمام عرب ممالک اپنے خارجی دشمن کے خلاف مل کر لڑیں، کسی ملک یمن جیسی کیفیت پیدا ہونیسے قبل حالات کو قابو کر لیا جائے۔ یمن میں ایران نے اپنے پالتو حوثی اور علی صالح کو استعمال کیا مگر سعودی عرب کی قیادت میں فیصلہ کن طوفان نے یمن میں ایران کے مذموم عزائم کو خاک میں ملا دیا۔