احمد آباد:17/نومبر(ایس او نیوز/آئی این ایس انڈیا)گجرات کے بناس کانٹھا میں ڈپٹی تحصیل دارشراب پیتے پکڑے گئے،سزا کے طور پرانہیں ہسپتال میں ایک ماہ کی صفائی کی سزاسنائی گئی ہے۔ڈپٹی تحصیل دار نے صفائی کا کام بھی شروع کر دیا ہے۔دراصل ڈیسا کے سابق ڈپٹی تحصیلدار کیرتی بھائی مکوانا اور ان کے دو ساتھیوں کو 2009میں ڈیسا کے ایک گیسٹ ہاؤس میں شراب پیتے پکڑا گیا تھا،یہ لوگ جوابھی کھیل رہے تھے۔اسی وقت پولیس نے چھاپے ماری میں تینوں کو گرفتار کر لیا۔ڈیسا ضلع عدالت میں یہ مقدمہ چل رہا تھا، جس میں تینوں کو ایک سال سزا دی گئی۔تینوں ملزمین ایک سال کی سزا کے خلاف دوبارہ عدالت پہنچے۔عدالت نے ایک سال کی سزا تو معاف کردی لیکن تینوں کو ڈیسا ہسپتال میں ایک ماہ صفائی کرنے کا حکم دیا۔ساتھ ہی عدالت نے یہ بھی حکم دیا ہے کہ ان کے کام کی ایک ویڈیو ریکارڈ کی جائے اور اسے عدالت میں پیش کیا جائے ۔ویڈیو ریکارڈنگ کاخرچ ڈپٹی تحصیل دارکواداکرنے کی ہدایت دی گئی ہے۔ڈسٹرکٹ کورٹ کی طرف سے سزا کے تعین کے بعد تین ملزمان نے جمعرات کو سول اسپتال پہنچ کر صفائی شروع کردی۔سول ہسپتال میں تینوں نے ہسپتال کے وارڈ میں جھاڑوپونچھالگایا۔