طالبات کو پولیس سے پٹوانے والے یوگی کس ’’ گورو یاترا‘‘ پر ہیں : راج ببر
احمد آباد ،13؍اکتوبر(ایس او نیوز؍آئی این ایس انڈیا)سیاسی جماعتوں نے گجرات اسمبلی کے انتخابات کے لئے اپنی جدوجہد تیز کردی ہے۔ حکمراں جماعت بی جے پی اور کانگریس کے رہنما کو عوام کے درمیان ہیں اور ایک دوسرے پرتنقیداورالزامات کا عمل جاری رکھے ہوئے ہیں حتی کہ راہل گاندھی کے تابڑ توڑ حملہ سے بوکھلائی بی جے پی امیٹھی میں راہل گاندھی کے خلاف مورچہ کھولے ہوئی ہے ۔ نجی ٹی وی چینل ’’ آج تک ‘‘ کے پانچ کے پنچایت پروگرام میں بی جے پی لیڈروں نے اپنی اپنی بات کہی تو وہیں کانگریس کے قد آور لیڈران نے بھی اپنی بات رکھی ۔ اس پروگرام کے تحت راج ببر نے کہا کہ مودی کے دور اقتدار میں پولس کے ذریعہ بنارس ہندو یونیورسٹی کے طالبات پر لاٹھیاں برسائی گئی اور وہی پارٹی ’’ گجرات میں گورو یاترا‘‘ کر رہی ہے ۔ کانگریس کے رہنما راج ببر اتر پردیش کے وزیر اعلی یوگی آدتیہ ناتھ کے گجرات کے دورے پر بات کرتے ہوئے کہا کہ یوگی اس وقت گجرات کے دورے پر ہیں اور ’’ گجرات گورو یاترا‘‘ میں شریک ہیں انہوں نے یوپی کیلئے کون سا کام کیا ہے کہ جس کی مثال دینے گجرات پہنچے ہیں ۔ واضح ہو کہ بی جے پی کانگریس کے تابڑ توڑ حملوں سے شکست خوردہ ہوچکی ہے حتی کہ سراسیمگی میں راہل گاندھی کے پارلیمانی حلقہ امیٹھی میں راہل گاندھی کی سیاسی ساکھ بگاڑنے کی کوشش میں ہے ۔