گجرات نے جنگ آزادی کی قیادت کی ہے ،فرقہ پرست طاقتوں کو آگے بڑھنے سے روکنا بھی اس کی اہم ذمہ داری ۔۔۔۔۔۔۔۔۔ نقطہ نظر : ڈاکٹر منظور عالم

Source: S.O. News Service | By I.G. Bhatkali | Published on 7th December 2017, 6:09 PM | ملکی خبریں | اسپیشل رپورٹس |

گجرات انتخابات کی تاریخ قریب آچکی ہے ،ممکن ہے جس وقت آپ یہ مضمون پڑھ رہے ہوں اس کے ایک دن بعد گجرات میں رائے شماری کا سلسلہ شروع ہوجائے ،9 اور 14 دسمبر کو دو مرحلوں میں ووٹنگ ہونی ہے جبکہ 18 دسمبر کو نتائج کا اعلان کیا جائے گا ۔گجرات کے رواں انتخابات پر پورے ہندوستان کی نظر ہے ،خاص طور پر حکمراں جماعت بی جے پی اور وزیر اعظم نریندر مودی گجرات انتخابات جس انداز سے لڑرہے ہیں اس سے پتہ چل رہاہے کہ یہ صوبائی انتخاب کے بجائے لوک سبھا کا الیکشن ہے ،عام انتخاب ہورہاہے جس کیلئے معمولی کارکنا ن سے لیکر پارٹی کے وزیر اعظم بھی دن ورات ایک کرچکے ہیں اور وہ اس طرح انتخابی ریلیوں میں شرکت کررہے ہیں جیسے وہ یہ انتخاب جیت کرخودوزیر اعلی کی کرسی پر براجمان ہونا چاہتے ہیں۔ یا مستقبل میں وہ اس عہدہ کے خواہشمند ہیں ۔اس میں کوئی دورائے نہیں کہ وزیر اعظم جس پارٹی کا ہوتاہے وہ اپنی پارٹی کیلئے محنت کرتاہے ،ا س کو کامیابی سے ہم کنار کرانے کیلئے اپنی صلاحیت کا استعمال کرتاہے لیکن جناب نریندر مودی صاحب وزیر اعظم ہونے کے ساتھ جس انداز سے اپنی پارٹی کیلئے ووٹ مانگتے نظر آرہے ہیں ماضی میں اس کی کوئی نظیر نہیں ملتی ہے اور یوں لگتاہے کہ وہ خود کو وزیر اعظم کے بجائے صرف پارٹی کارکن ہی سمجھتے ہیں جس کی بنا پر تمام اخلاقی حدود پارکرجاتے ہیں۔ہر چھوٹے بڑے الیکشن میں ان کا ووٹ مانگنا یہ بھی بتاتاہے کہ بی جے پی میں اس کے علاوہ کو ئی اور چہرہ نہیں ہے جس کی بنیاد پر وہ ووٹ مانگ سکے ۔بہر حال الیکشن قریب ہیں، گجرات کے اس انتخاب میں متعدد سیاسی پارٹیاں زور آزمائی کررہی ہیں لیکن اصل مقابلہ بی جے پی اور کانگریس کے درمیان ہے ۔

الیکشن دستور کی روح ہے ،جمہوریت کی بقاءالیکشن پر قائم ہے اور جمہوریت کی روح یہ ہے کہ عوام کی خدمت کی جائے ،ان کی جذبات کی قدر کی جائے،انہیں ہر طرح کی آزادی فراہم کرائی جائے ،اپنے خاندان کا فرد سمجھ کر بہتر سلوک کیا جائے ،اپنی پارٹیوں کی تعریف اور خوبیوں کو اس انداز میں بیان کیا جائے کہ وہ اخلاقی معیا ر پر قائم ہوں، روداری ہو ،مخالف پارٹیوں کیلئے جذبہ احترام باقی ہو، شائستہ اور مہذب زبا ن استعمال کی گئی ہو۔ حسن اخلاق کے پیکر اور باہم رواداری کے جذبہ کو فروغ دینے والے ہمیشہ ان چیزوں کا خیال رکھتے ہیں ،اپنے دشمنوں کیلئے بھی وہ مہذب زبان استعمال کرتے ہیں،مخالفین کی خامیوں اور ناکامیوں کا تذکرہ کرنے کے دوران بھی وسعت ظرفی سے کام لیتے ہیں ،ایسے الفاظ کے استعمال سے مکمل گریز کرتے ہیں جو گھٹیا ہوں،اوچھے  ہوں ،نفرت آمیز ہوں،دشمنی کو بڑھاوا دیتے ہوں، ماحول کو زہر آلود بناتے ہوں،فرقہ واریت کوجنم دیتے ہوں،شرافت عزت نفس کے خلاف ہو ں اور جس کے نتیجے میں ہر پل خوف وہراس کا ماحول قائم رہتاہو ۔افسوسناک بات یہ ہے کہ گجرات کے حالیہ الیکشن میں ماضی کے مقابلے میں ایسی گھٹیا اور اخلاق سوز زبانیں استعمال کی گئی ہیں جس کی ایک جمہوری ملک میں کوئی گنجائش نہیں ہے اور دستور کیلئے شرمناک ہے ۔

ملک کے عام حالات دن بدن بدتر ہوتے جارہے ہیں،ہر طرف نفرت اور فرقہ وارانہ ماحول بن گیا ہے ،حساس لوگ مایوسی کے شکار ہوتے جارہے ہیں،ان امور کی وجہ سے دنیا بھر میں ہندوستان کی بدنامی ہورہی ہے ،سوئے اتفاق ہمارے وزیر اعظم بھی ہندوستان کو بدنام کرنے میں کوئی کسر نہیں چھوڑتے ہیں اور وزرات عظمی کے منصب کا لحاظ کئے بغیر ایسی باتیں کہہ  جاتے ہیں،ایسے جملوں کا استعما ل کرتے ہیں جس سے عالمی سطح پر ہندوستانی عوام کو شرمندگی کا سامناکرناپڑتاہے ۔یہ بات بھی قابل غور ہے کہ حکومت کے قیام کے فورا بعد آر ایس ایس ،ذیلی تنظیمیں، بی جے پی اور اس سے وابستہ افراد نے جس زہریلی اور گھٹیا زبان کا استعمال شرو ع کیا تھا وہ سلسلہ اب تک باقی ہے ،ہمارا اندازہ تھاکہ حکومت کے قیام اور اقتدار مل جانے کے بعدیہ لوگ اپنے اندر تبدیلی لائیں گے ،مین اسٹریم میں آکر باتیں کریں گے ،اپنی گفتگو ،اپنے انداز اوررویے سے صاحب اقتدار اور حکمراں جیسا رول اداکریں گے ،تہذیب وثقافت اور اخلاقی اقدار کو ملحوظ خاطر رکھیں گے لیکن افسوس کی بات یہ ہے کہ اقتدار حاصل کرکے  کسی عہد ہ  پر فائز ہونے کے بعد بھی ان کے رویے اورطریقہ کار میں کوئی تبدیلی نہیں آئی ہے ،وہی اشتعال انگیزی ،نفرت آمیز باتیں ،زہریلی فضاء آج بھی ان کے ارد گرد نظر آتی ہیں اور ایسا لگتا ہے کہ امن وآشتی ،میٹھی زبان ، پرامن ماحول اور ان سب کے درمیان تضاد کا رشتہ ہے ،ان کی پروش وپرداخت ہی نفر ت انگیز فضاءمیں ہوئی ہے ۔

گجرات میں بی جے پی گذشتہ 22 سالوں سے اقتدار میں ہے ،یہ موقع تھاکہ بی جے پی اپنی 22 سالہ کارکردگی کو عوام کے سامنے پیش کرتی ، ترقی کے طے کردہ منازل پیش کرتی ،اپنے کئے ہوئے کاموں کی تفصیلات بیان کرتی ،عوام کی آنکھوں سے آنکھیں ملا کر یہ کہتی  کہ 22 سالوں میں ہم نے یہ کیا ہے ،ریاست کو ترقی یافتہ بنایا ہے ،عوام کی تمام پریشانیاں دور کی ہیں ، تمام شعبہ حیات میں کام کیا ہے لیکن معاملہ برعکس ہے ،حکمراں جماعت کی زبان اپوزیشن سے بھی زیادہ تیز ہے ،کارکردگی کو سامنے لانے کے بجائے فرقہ ورانہ ماحول بناکر ووٹ حاصل کرنے کی کوشش کی جارہی ہے ،وزیر اعظم بھی ترقی اور فلاح وبہبودی کی باتیں کرنے کے بجائے فرقہ ورانہ خطوط پر گامزن ہیں۔الزام تراشی سے آگے بڑھ کر  کوئی بات نہیں کررہے ہیں۔

گجرات الیکشن کی یہ پوری تصویر ہے ،بی جے پی کے انتخابی سفر کی یہ داستان ہے جس کے تئیں پورے ملک کی عوام بالخصوص ریاست گجرات کے لوگوں کیلئے فکرمند ہوناضروری ہے ،گجرات تجارت کا مرکز ہے ،آزادی کی جنگ میں یہ ریاست قیادت کا فریضہ انجام دے چکی ہے ،یہاں کے باشندوں نے غلامی کے خلاف صدائے اجتجاج بلندکرکے آزادی کی آواز بلندکی تھی،تعلیم ،ٹیکنا لوجی او ردیگر شعبہ میں  بھی یہ ریاست آگے ہے ،ایسے میں اس ریاست پر بہت اہم ذمہ داری عائد ہوتی ہے ،اس صوبہ کے عوام پر ملک میں نفر ت کی فضاءکو ختم کرنے اور بھائی چارگی کو فرو غ دینے کیلئے جدوجہد کرنے کی ضرورت ہے اور اس کا سب اہم ذریعہ ہے کہ اقتدار انہیں سونپا جائے جو فرقہ واریت کی سیاست نہیں کرتے ہیں، ماحول کو زہر آلود بنانے سے گریز کرتے ہیں،ترقی اور فلاح وبہبود کی سیاست پر یقین رکھتے ہیں،ان طاقتوں کو اقتدار سے مکمل طور پر دو ر کیا جائے جنہوں نے ملک کو بانٹنے کاکام کیا ہے ،مذہب کے نام پر تفریق ڈالنے کا کام کیاہے ،فلاح وبہبود کے بجائے صرف ہواہوائی سے کام لیاہے ،خوش کن وعدے او رچکنی چپڑی باتوں کے علاوہ کچھ اور ان کی حکومت میں نہیں ہوسکا ہے ۔

کسی بھی ملک کی مضبوطی اور ترقی کیلئے جمہوریت کا مضبوط ہونا ضروری ہے ،جس ملک کی ہر کڑی اور ہر اینٹ جب دستور کے دائرے میں ہوتی ہے وہاں جمہوریت مضبوط ہوتی ہے ،ایسا ملک ترقی کے شاہ راہ پر گامزن ہوتاہے۔گجرات کی عوام بھی ماضی میں پورے ہندوستان کی قیادت کرچکی ہے ،انگریزوں کے خلاف جنگ لڑچکی ہے ،اس کے اندر فرقہ پرست طاقتوں سے لڑنے اور غلط ہاتھوں میں اقتدار کو جانے سے روکنے کا جذبہ موجود ہے اس لئے اس انتخاب میں بھی اس ریاست پر پورے ہندوستان کی نگاہیں ٹکی ہوئی ہیں اور بڑی امید ی وابستہ ہیں ۔

دستور ہمارے لئے سب سے اہم ہے ،آئین نے موقع فراہم کیا ہے ،الیکشن کا فیصلہ دستور کی روشنی میں ہوتاہے خواہ تاخیر سے ہی سہی،اب یہ عوام کی عقل وفراست پر مبنی ہے کہ اس کا فائدہ اٹھاتے ہوئے ریاست کو بہتر حکومت دینا چاہتی ہے یا  پھر جذبا ت کی رومیں بہہ کر ان طاقتوں کو اقتدار سونپے گی جس سے ملک مزید زوال پذیر ہوگا اور دنیابھر میں جگ ہنسائی ہوگی ۔ان باتوں کی جانب اپنے گذشتہ کالم میں بھی ہم بارہا توجہ دلاچکے ہیں ،آل انڈیاملی کونسل کے قومی کنونشن میں بھی دستور بچاﺅ دیش بنائو  کا نعرہ دیاگیاتھا ،گجرات الیکشن کے موقع پر ریاست کی عوام سے پوری امید ہے کہ وہ دانشمندی سے کام لیں گی ،عقل وفراست کا استعمال کرکے فرقہ پرست طاقتوں کو آگے بڑھنے سے روکیں گی ۔

(مضمون نگار معروف اسکالر اور آل انڈیا ملی کونسل کے جنرل سکریٹری ہیں)

ایک نظر اس پر بھی

منی شنکر ایئر کی رکنیت دوبارہ بحال ،مودی کیخلاف منفی تبصرہ پرکیا گیا تھا معطل 

گجرات اسمبلی انتخابات مودی کے لیے نیچ آدمی لفظ کا استعمال کرنے پر معطل منی شنکر ایئر کی کانگریس میں بنیادی رکنیت ایک بار پھر بحال کر دی گئی ہے ۔یہ فیصلہ پارٹی کی انتظامی کمیٹی کی سفارش کے بعد لیا گیا ہے۔

سیلاب متاثرہ کیرالہ کی مدد کے لیے اکھلیش یادونے کی جذباتی اپیل 

کیرالہ اب صدی کی سب سے بڑی تباہی کا شکار ہے۔گزشتہ 100 سالوں میں کیرل نے ایسی تباہی نہیں دیکھی تھی، جس کی مار ابھی وہ جھیل رہا ہے۔ سیلاب سے تباہ کیرالہ اور وہاں کے لوگوں کے لئے چاروں طرف سے مدد کے ہاتھ اٹھ رہے ہیں۔

مظفر پورشیلٹرہوم: منجو ورماکے خلاف آرمس ایکٹ کے تحت مقدمہ درج

مظفر پورشیلٹرہوم جنسی تشدد معاملے میں بہار کی سابق سماجی فلاح وبہبودکی وزیر منجو ورما کی رہائش گاہ پر ہوئے سی بی آئی کے چھاپے کے دوران 50کارتوس ملنے کے بعد ورما اور ان کے شوہر کے خلاف ایف آئی آر درج کر لی گئی ہے۔

مرحوم حضرت مولانا محمد سالم قاسمی کے کمالات و اوصاف ۔۔۔۔۔۔۔۔ بہ قلم: خورشید عالم داؤد قاسمی

دار العلوم، دیوبند کے بانی امام محمد قاسم نانوتویؒ (1832-1880) کے پڑپوتے، ریاست دکن (حیدرآباد) کی عدالتِ عالیہ کے قاضی اور مفتی اعظم مولانا حافظ محمد احمد صاحبؒ (1862-1928) کے پوتے اور بیسویں صدی میں برّ صغیر کےعالم فرید اور ملت اسلامیہ کی آبرو حکیم الاسلام قاری محمد طیب صاحب قاسمیؒ ...

اردو میڈیم اسکولوں میں نصابی  کتب فراہم نہ ہونے  سے طلبا تعلیم سے محروم ؛ کیا یہ اُردو کو ختم کرنے کی کوشش ہے ؟

اسکولوں اور ہائی اسکولوں کی شروعات ہوکر دو مہینے بیت رہے ہیں، ریاست کرناٹک کے 559سرکاری ، امدادی اور غیر امدادی اردو میڈیم اسکولوں اور ہائی اسکولوں کے لئے کتابیں فراہم نہ  ہونے سے پڑھائی نہیں ہوپارہی ہے۔ طلبا ، اساتذہ اور والدین و سرپرستان تعلیمی صورت حال سے پریشان ہیں۔

بھٹکل کڑوین کٹّا ڈیم کی تہہ میں کیچڑ اور کچرے کا ڈھیر۔گھٹتی جارہی ہے پانی ذخیرہ کی گنجائش

امسال ریاست میں کسی بھی مقام پر برسات کم ہونے کی خبرسنائی نہیں دے رہی ہے۔ عوام کے دلوں کو خوش کرنے والی بات یہ ہے کہ بہت برسوں کے بعد ہر جگی ڈیم پانی سے لبالب ہوگئے ہیں۔لیکن اکثریہ دیکھا جاتا ہے کہ جب برسات کم ہوتی ہے اور پانی کا قحط پڑ جاتا ہے تو حیران اور پریشان ہونے والے لوگ ...

سعودی عربیہ سے واپس لوٹنے والوں کو راحت دلانے کا وعدہ ؛ کیا وزیر اعلیٰ کمارا سوامی کو کسانوں کا وعدہ یاد رہا، اقلیتوں کا وعدہ بھول گئے ؟

انتخابات کے بعد سیاسی پارٹیوں کو اقتدار ملنے کی صورت میں کیے گئے وعدوں کو پورا کرنا بہت اہم ہوتا ہے۔ جنتادل (ایس) کے سکریٹری کمارا سوامی نے بھی مخلوط حکومت میں وزیرا علیٰ کا منصب سنبھالتے ہی کسانوں کا قرضہ معاف کرنے کا انتخابی وعدہ پورا کردیااور عوام کی امیدوں پر پورا اترنے کا ...