نئی دہلی7نومبر ( ایس او نیوز؍آئی این ایس انڈیا ) وکاس آیا یا نہیں ،مگر ملک میں شہروں اور جگہوں کے ناموں کا تبدیل کرنے کا دور جاری ہے۔ شہروں کے نام تبدیل کی فہرست میں اب گجرات کے اہم شہر احمد آباد کا نام بھی جڑنے والا ہے۔ دراصل وزیر اعلی وجے رپانی کی قیادت والی حکومت احمد آباد شہر کے نام کو تبدیل کرنے پر غور کر رہی ہے۔ اگر ایسا ممکن ہوا تو احمد آباد شہر کرناوتی کے نام سے جانا جائے گا۔ مانا جاتا ہے کہ کرناوتی احمد آباد کا قدیم نام ہے۔ دراصل گجرات کے نائب وزیر اعلی نے میڈیا سے خطاب کرتے ہوئے کہا کہ بی جے پی حکومت احمد آباد کا نام تبدیل کرنے کے لئے تیار ہے، اگر حکومت قانونی رکاوٹوں کو پار کر لیتی ہے اور لوگوں کا ضروری حمایت حاصل کر لیتی ہے۔ انہوں نے کہا کہ کافی وقت سے، لوگ احمد آباد کا نام تبدیل کرنے کی کوشش کر رہے ہیں اور احمد آباد کی جگہ کرناوتی نام رکھنا چاہ رہے ہیں۔ اگر ہم قانونی رکاوٹوں کو دورکرنے کے لئے لوگوں کی حمایت حاصل کر لیتے ہیں تو ہم اس کا نام تبدیل کرنے کے لئے تیار ہیں۔ احمد آباد کے لوگ کرناوتی نام کو ترجیح دیتے ہیں. جب بھی مناسب وقت ہو گا، ہم نام تبدیل کر یں گے۔