احمد آباد،12؍دسمبر (ایس او نیوز؍آئی این ایس انڈیا ) کانگریس کے صدر راہل گاندھی نے منگل کو گجرات اسمبلی انتخابی مہم کے آخری دن پر ایک پریس کانفرنس پر نریندر مودی کے خلاف کئی الزامات لگائے ۔ کانگریس کے نو منتخب صدر راہل گاندھی نے کرپشن، کسانو ں کی بدحالی ،نوٹ بندی اور غیر معقول جی ایس ٹی کے موضوع پر بی جے پی کو گھیرا راہل گاندھی نے علی الاعلان کہا کہ مودی نے بدعنوانی پر کچھ نہیں کہا جے شاہ کے کیس میں خاموش کیوں ہے؟ رافیل معاہدے پر وزیر اعظم مودی نے ’’چپ شاہ ‘‘ کا روزہ کیوں رکھا ہے ۔ کسانوں کا قرض معاف نہیں کیا گیا ، لیکن صنعت کاروں کا قرض معاف کر دیا گیا ۔ ہم نے 70 ہزار کروڑ کا قرض معاف کیا۔ راہل گاندھی نے کہا کہ مندر جانے اور اس کی زیارت میں کون سی ممانعت ہے ؟ میں مندر جاؤں گا اور مندر جاکر ایک روحانی شفتگی کا احساس ہوتا ہے ۔ انہوں نے کہا کہ میں کیدار ناتھ بھی جاؤں گا ۔ انہوں نے مزید کہا کہ مجھے جب بھی موقعہ ملتا ہے مندر جاکر عوام کی بھلائی کے لیے ’’ پرارتھنا ‘‘ کرتا ہوں ۔ راہل گاندھی نے کہا کہ بی جے پی شکست دیکھ کر خوفزدہ ہے ا ور بوکھلاہٹ کا شکار ہوگئی ہے ۔ گجرات کے انتخابات میں کانگریس کی فتح یقینی ہے۔راہل گاندھی نے کہا کہ بی جے پی نے 22 سال تک صرف ایک ہی ترقی کر پائی ہے وہ یہ کہ چند صنعت کاروں کو ’’ وکاس ‘‘ کا آشیرو اد ملا ہے ۔راہل گاندھی نے کہا کہ بی جے پی حکومت نے گزشتہ سال 8 نومبر کو 8بجے شام زبردست دھچکا دیا اور اس کے بعد گبر سنگھ ٹیکس (جی ایس ٹی) کو عوام پر لازم قرار دے کر کمر توڑ دی ۔ علاوہ ازیں راہل گاندھی کو کامل یقین ہے کہ بی جے پی کے دور اقتدار سے نالاں عوام گجرات اسمبلی انتخابات میں سبق ضرور سکھائیں گے ۔