وی ایم میں بلیوٹوتھ کے ذریعے چھیڑچھاڑ،کانگریس نے کی شکایت، الیکشن کمیشن نے تحقیقات شروع کیں
احمد آباد، 09؍دسمبر (ایس او نیوز؍آئی این ایس انڈیا)کانگریس نے گجرات میں ای وی ایم مشینوں میں بلیوٹوتھ کیذریعہ چھیڑ چھاڑ کرنے کی بات کہی ہے۔ اس نے اس سلسلے میں الیکشن کمیشن کو شکایت کی ہے۔کمیشن نے ماہرین کو چیک کرنے کے لئے موقع پر بھیجا ہے۔ای وی ایم مشینوں کے بلیو ٹوتھ سے جوڑنے کا یہ معاملہ پوربندر میں سامنے آیا۔گجرات میں کانگریس کے سینئر لیڈر ارجن موڑھواڈیا نے پوربندر کے ایک مسلم اکثریتی علاقے کے تین پولنگ اسٹیشنوں پر ای وی ایم سے ممکنہ چھیڑچھاڑ کی شکایت کی اور کہا کہ کچھ مشینیں بلیوٹوتھ کے ذریعے بیرونی آلات سے جڑی پائی گئی ہیں۔الیکشن کمیشن نے کہا کہ کانگریس لیڈر کی شکایت پر تحقیقات شروع کر دی گئی ہے۔پوربندر سے کانگریس امیدوار موڑھواڈیا نے کہاکہ ہم نے پایا کہ مسلم اکثریتی علاقے میمنواڑا کے تین پولنگ اسٹیشنوں میں الیکٹرانک ووٹنگ مشینیں بلیوٹوتھ کے ذریعے بیرونی آلات سے جڑی ہوئی ہیں۔جب بھی کسی کے موبائل فون میں بلیوٹوتھ آن کیا جاتا ہے تو ای سی او 105 نام کاایک آئیکن دکھائی دیتا ہے۔ انہوں نے الزام لگایا کہ اس کا صاف مطلب یہ ہے کہ بلیوٹوتھ کے ذریعے آلے کو استعمال کر کے الیکٹرانک ووٹنگ مشینوں سے چھیڑ چھاڑ کی جا سکتی ہے۔کانگریس لیڈر نے کہاکہ ای وی ایم میں لگی چپ بلیوٹوتھ کے ذریعے پروگرام کرنے کے قابل لگتی ہے اور یہ چھیڑ چھاڑ کا خدشہ پیدا کرتی ہے۔ووٹنگ نظام بیرونی آلات کے جڑنے سے آزاد ہونا چاہئے۔موڑھواڈیا نے کہا کہ انہوں نے ضلع الیکشن افسر کے پاس اس معاملے کی شکایت درج کرائی ہے۔الیکشن افسر نے پولنگ اسٹیشن کا دورہ کیا اور ان سب چیزوں کامعائنہ کیا۔کانگریس نے الیکشن کمیشن سے کئی شکایتیں کی ہیں۔ ان میں وزیر اعلی وجے روپانی کو جو خود بھی امیدوار ہیں کے ووٹ ڈالنے کے دوران احمد آباد میں پریس کانفرنس کرکے مثالی ضابطہ اخلاق کی خلا ف ورزی کرنے کی شکایت کی گئی۔ چیف الیکٹورل افسر نے کہا کہ تمام شکایتوں کی جانچ کی جا رہی ہے۔