بنگلورو:ہفتے بھر بعد پہلی بار ریزورٹ سے باہر نکلے گجرات کے کانگریسی اراکین اسمبلی۔ کرناٹک کے گورنرسے کی ملاقات،پارٹی نے رسمی تبادلہ خیال بتایا
بنگلورو5اگست(ایس او نیوز/آئی این ایس انڈیا)کانگریس نے 29جولائی کو گجرات کے اپنے 44ممبران اسمبلی کو بنگلوربھیج دیا تھا ۔گجرات کے کانگریسی اراکین اسمبلی بنگلورشہر کے مضافات میں واقع ریزورٹ سے تقریباََ ہفتہ بھر بعد ہفتہ کو باہر نکلے اور کرناٹک کے گورنر سے ملاقات کی۔یہ ممبران اسمبلی بنگلورمیں واقع سیکرٹریٹ بھی گئے۔کانگریس نے 29جولائی کواپنے 44ممبران اسمبلی کویہاں بھیج دیاتھا۔کانگریس نے الزام لگایا تھا کہ اس نے یہ قدم گجرات میں 8اگست کو ہونے والے راجیہ سبھا انتخابات سے پہلے بی جے پی کی طرف سے ممبران اسمبلی کوتوڑنے اورخریدوفروخت کی کوششوں سے بچانے کے لیے اٹھایاتھا۔اس راجیہ سبھا انتخابات میں کانگریس نے پارٹی صدر سونیا گاندھی کے سیاسی سیکرٹری احمد پٹیل کو میدان میں اتاراہے۔ممبران اسمبلی کوریزورٹ سے ریاستی نقل و حمل کی بس میں شاہی محل لے جایا گیا، جہاں انہوں نے گورنر وجے بھائی والاسے ملاقات کی۔کانگریس ذرائع نے کہا کہ یہ ایک رسمی ملاقات تھی، کیونکہ وجے بھائی بھی گجرات سے آتے ہیں اور وہ وہاں اسمبلی صدر اور وزیر خزانہ کے طورپرکام کرچکے ہیں۔ممبران اسمبلی سے ان کے اچھے تعلقات ہیں۔کانگریس کے ترجمان اور گجرات کے ممبران اسمبلی شکتی سنگھ گوہل نے ٹویٹ کرکے کہاکہ کرناٹک کے گورنر وجے بھائی والانے ہم سب سے، (گجرات کے 44ممبران اسمبلی)سے انفرادی طورپرملاقات کی۔یہ تبادلہ خیال جمہوریت کی روح ہے۔