بنگلورو:18/ اگست(ایس او نیوز) الگ الگ زمروں کے ٹیکس نظام کو یکجا کرتے ہوئے مرکزی حکومت کی طرف سے جی ایس ٹی کی شکل میں رائج یکساں ٹیکس نظام کا مقصد ٹیکس کی ادائیگی کو سہل بنانا ہے۔ یہ بات آج معروف ماہر معاشیات اور آئی ٹی آر اے ایف کے چیرمین ڈاکٹر پارتھا سارتھی نے کہی۔ آج یہاں ایف کے سی سی آئی ممبران سے خطاب کرتے ہوئے انہوں نے کہاکہ جی ایس ٹی کے نفاذ کے جو نتائج برآمد ہوں گے وہ آنے والے برسوں میں سامنے آئیں گے۔ جی ایس ٹی کے لاگو ہوتے ہی ملک بھر میں لاکھوں افراد نے اس کے تحت اندراج کروایا ہے۔ عام لوگوں میں اس ٹیکس کے متعلق بیداری کی ضرورت پر زور دیتے ہوئے انہوں نے کہاکہ دنیا کے160 ممالک میں ایسا نظام رائج ہے۔ عالمی معاشی نظام سے ملک کے معاشی نظام کو ہم آہنگ کرنے کیلئے یہ متعارف کروایا گیا ہے۔ اس موقع پر ریاستی محکمۂ کمرشیل ٹیکس کے کمشنر رتھوک پانڈے نے کہاکہ ریاستی حکومت نے ٹیکس کے نظام کو جی ایس ٹی سے ہم آہنگ کرنے کیلئے غیر معمولی تیزی کے ساتھ قدم اٹھائے ہیں۔ تجارتی طبقے نے بھی اسے کافی تیزی سے اپنایا ہے۔ا س سلسلے میں ریاستی حکومت کی طرف سے عوامی بیداری بڑے پیمانے پر لائی گئی ہے۔ جی ایس ٹی نظام کے تحت آنے والے تجارتی اداروں کو رٹرنس کس طرح بھرنا ہے اس سلسلے میں اچھی خاصی جانکاری عوام تک پہنچائی گئی ہے۔