بنگلورو،29؍مئی(ایس او نیوز)مرکزی حکومت کی طرف سے لاگو کئے جارہے نئے جی ایس ٹی نظام کے تحت ہوٹل کی صنعت پر 18 فیصد ٹیکس لاگو کئے جانے کی مخالفت کرتے ہوئے کل ریاست بھرمیں ہوٹل بند رہیں گے۔اسی طرح نئے نظام کے تحت دواؤں کی آن لائن خریداری کی اجازت دینے مرکزی حکومت کے فیصلے کی مخالفت کرتے ہوئے کل ریاست بھر میں دواؤں کی دکانیں بھی بند رہیں گی۔ ہوٹل مالکان نے اعلان کیا ہے کہ بنگلور سمیت ریاست بھر میں کل دن بھر وہ اپنی ہوٹلیں بند کرکے مرکزی حکومت کے اس فیصلے کے خلاف احتجاج کریں گے جس کے تحت ہوٹلوں میں کھانا کھانے پر 18 فیصد جی ایس ٹی لاگو کیاگیا ہے۔کل ہوٹلوں کے ساتھ ریاست بھر میں بیکریاں ، مٹھائی فروش وغیرہ بھی اپنا کاروبار بند رکھیں گے۔ بتایاجاتا ہے کہ یہ بند صرف ریاست کرناٹک تک محدود نہیں بلکہ تمام جنوبی ریاستوں میں بند کیا جارہا ہے ۔ بنگلور ہوٹل مالکان کے اسوسی ایشن کے صدر چندر شیکھر ہبار نے کہاکہ ہوٹل مالکان کی طرف سے جی ایس ٹی کی مخالفت نہیں کی جارہی ہے بلکہ 50 لاکھ روپیوں تک کا ٹرن اوور کرنے والے چھوٹے نان اے سی ہوٹلوں پر بارہ فیصد اور اے سی ہوٹلوں پر 18 فیصد ٹیکس لاگو کرنے مرکزی حکومت کے فیصلے کی مخالفت کی جارہی ہے۔انہوں نے کہاکہ ہوٹل مالکان پانچ فیصد تک جی ایس ٹی ادا کرنے تیار ہیں۔ 18 فیصد ٹیکس ادا کرنا قطعاً ممکن نہیں ہے۔ انہوں نے کہاکہ فی الوقت ہوٹلوں سے چار فیصد ٹیکس وصول کیاجارہاہے، اور وہ بھی گاہکوں سے لے کر ادا کیا جاتا ہے۔اگر جی ایس ٹی 12 سے 18 فیصد تک بڑھادیا گیاتو اس سے گاہکوں کو اور پریشانی ہوگی اور ان کی تجارت متاثر ہوسکتی ہے۔ انہوں نے کہاکہ کل میسور بینک سرکل میں ہوٹل مالکان احتجاجی مظاہرہ کریں گے اور جی ایس ٹی بورڈ کو اس سلسلے میں ایک عرضداشت بھی پیش کی جائے گی۔دوسری طرف دواؤں کے دکانداروں نے دواؤں کی آن لائن فروخت کی اجازت دینے مرکز کے فیصلے کی مخالفت کیلئے کل احتجاج کرنے کا فیصلہ کیا ہے۔ مرکزی حکومت نے اعلان کیا ہے کہ موبائل ایپ کے ذریعہ اگر ڈاکٹر کی دی گئی چٹی اسکیان کرکے آن لائن دوائیں طلب کی گئیں تو مہیا کرائی جاسکتی ہیں۔ دواؤں کے دکان داروں نے مرکزی حکومت کے اس فیصلے پر سخت اعتراض کرتے ہوئے کہا کہ اس اقدام سے ان کی تجارت ختم ہوجائے گی۔ اس پر احتجاج کرنے کیلئے کل ریاست بھر میں دواؤں کی دکانیں بند رہیں گی۔