رواں سال کرناٹک کو جی ایس ٹی معاوضہ کم ملے گا: وزیر اعلیٰ کمار سوامی
بیلگاوی/بنگلورو۔14دسمبر( سالار نیوز) وزیر اعلیٰ ایچ ڈی کمار سوامی نے آج ریاستی اسمبلی میں کہا کہ پچھلے سال کے مقابلہ رواں مالی سال میں ریاست کرناٹک کومرکز سے جی ایس ٹی کامعاوضہ کم ملنے کا امکان ہے۔ پچھلے سال2017-18میں کرناٹک کومرکز سے 7500کروڑ روپئے جی ایس ٹی کا معاوضہ ملا تھا ۔کرناٹکا گوڈس اینڈ سرویس ٹیکس ( ترمیمی) بل 2018ء پر بحث کے دوران اپوزیشن اراکین کے اٹھائے گئے سوالات پر جواب دیتے ہوئے وزیراعلیٰ نے یہ اطلاع دی ۔
انہوں نے کہا کہ پچھلے سال کرناٹک کو مرکز سے 7,500کروڑ روپئے معاوضہ ملا تھا امسال یہ معاوضہ کم ملے گا۔ حالانکہ وزیراعلیٰ نے معاوضہ کی شکل میں کرناٹک کو کتنی رقم ملے گی یہ نہیں بتایا اورمعاوضہ کی رقم گھٹ جانے کی وجہ بھی نہیں بتائی ۔ قبل ازیں اس بحث میں حصہ لیتے ہوئے بی جے پی اراکین ویشویشور ہیگڈے کاگیری ،بسوراج بومائی اور دیگر نے یہ معلوم کرناچاہا کہ مرکزی حکومت سے کرناٹک کو جی ایس ٹی کی کیا مناسب رقم مل رہی ہے؟انہوں نے یہ بھی کہا کہ جی ایس ٹی میں چند خامیاں ہیں۔ ان کو درست کرنے یہ معاملہ مرکز کے پاس اٹھانے انہوں نے حکومت کومشورہ بھی دیا ۔ اس پرجواب دیتے ہوئے کمار سوامی نے کہا کہ جی ایس ٹی سے متعلق ریاستی حکومت کے پاس محدود اختیارات ہیں ۔ ہم ان خامیوں کاپتہ لگا کر درست کریں گے ۔جی ایس ٹی دینے کی روک تھام کیلئے مناسب اقدامات کریں گے ۔ٹیکس کے نئے رٹرن داخل کرنے کی پالیسی کو نافذ کرنے ترمیم بل ایوان میں پیش کیا گیا ہے ۔ تفصیلی معائنہ کے لئے یہ بل ایوان کی جوائٹ سلیکٹ کمیٹی کے پاس بھیجنے کا چند بی جے پی اراکین نے مطالبہ بھی کیا ۔ اس پر وزیراعلیٰ کی وضاحت کے بعد بل پر منظوری دیدی گئی ۔ اس بل کی منظوری کے بعد بدعنوان پریکٹس میں ملوث تاجروں کے لئے تین سال کی رعایت نہیں رہے گی۔ آج اسمبلی میں کرناٹک لینڈ (ریونیو ر سکینڈترمیمی) بل ۔2018ء پر بھی منظوری دے دی گئی ۔