گریٹر نوئیڈا،19؍جولائی (ایس او نیوز؍ایجنسی) گریٹر نوئیڈا کے شاہ بیری گاؤں میں گذشتہ روز عمارت منہدم ہو گئی تھی جس کے ملبے سے ایک اور لاش نکال لی گئی ہے۔ حادثے میں جان گنوانے والے افراد کی تعداد 9 ہو گئی ہے۔ موقع پر ریسکیو آپریشن تا حال جاری ہے، جسے این ٹی آر ایف کی ٹیمیں انجام دے رہی ہیں۔ ملبے میں ابھی مزید لوگوں کے دبے ہونے کا امکان ہے۔
اس معاملہ کے تعلق سے گریٹر نوئیڈا کی ایک افسر ویبھا چہل پر کارروائی کی گئی ہے۔ انہیں او ایس ڈی کے عہدے سے ہٹا کر زراعت کے شعبہ میں بھیج دیا گیا ہے۔ علاوہ ازیں گریٹر نوئیڈا اتھارٹی کے پروجیکٹ منیجر وی پی سنگھ اور معاون پروجیکٹ منیجر اختر عباس زیدی کو معطل کر دیا گیا ہے۔
واضح رہے کہ گریٹر نوئیڈا کے شاہ بیری گاؤں میں منگل کی رات 6 منزلہ زیر تعمیر عمارت بغل کی ایک پرانی عمارت پر گر گئی تھی۔ عمارت گرنے کے کچھ دیر بعد سے ہی راحت اور بچاؤ کا کام کرنا شروع کر دیا گیا تھا، جو تا حال جاری ہے۔