نئی دہلی،5جنوری (ایس او نیوز ؍آئی این ایس انڈیا)آئی ٹی اور وزیر قانون روی شنکر پرساد نے جمعہ کو راجیہ سبھامیں کہاہے کہ ایک لاکھ روپے سے کم رقم والے اقتصادی دھوکہ دہی کے معاملات پر غور کرنے کے لئے حکومت ریزرو بینک کے ساتھ مل کر کام کر رہی ہے۔وہیں انہوں نے کہا کہ اعداد و شمار کی حفاظت کے لئے ایک بل تیار کیا جا رہا ہے۔

انہوں نے راجیہ سبھا کے وقفہ سوال کے دوران اضافی سوالات کے جواب میں یہ معلومات دی،اب ریزرو بینک ایک لاکھ روپے سے زیادہ رقم سے منسلک جعل سازی کے معاملات پر مختلف بینکوں کے ساتھ مل کر نظر رکھتی ہے۔ہندوستان کی ڈیجیٹل اور آئی ٹی طاقت کا ذکر کرتے ہوئے پرساد نے کہا کہ دنیا میں اس کی مثال ہے۔انہوں نے کہا کہ ہندوستان کے اعداد و شمار کو کوئی نہیں چرا سکتا ہے اور قوانین کی خلاف ورزی کرنے پر سخت کارروائی کی جائے گی۔انہوں نے کہا کہ مالیاتی ڈیٹا سیکورٹی بل تیار کیا جا رہا ہے جس میں ڈیٹا چوری سمیت مختلف مسائل شامل ہوں گے۔انہوں نے کہا کہ سائبر جرائم سے نمٹنے کے لئے سیکورٹی ٹریننگ کے علاوہ ٹریننگ پر بھی زور دیا جا رہا ہے۔ انہوں نے کہا کہ پولیس میں علیحدہ آئی ٹی سیل بھی بنایا گیا ہے۔