رافیل سے متعلق غلط حقائق پیش کرنے کی حکومت ذمہ دار ، سپریم کورٹ اس کے لیے مناسب فورم نہیں: کپل سبل
نئی دہلی ،16؍ دسمبر (ایس او نیوز؍آئی این ایس انڈیا) رافیل ڈیل کو لے کر سپریم کورٹ کے فیصلے کے بعد ایک بار پھر مودی سرکار اور کانگریس مدمقابل ہیں۔ایک طرف جہاں مودی حکومت سپریم کورٹ کے فیصلے کو اپنی جیت بتا رہی ہے وہیں کانگریس حکومت پر سپریم کورٹ سے حقیقت چھپانے اور ملک کوگمراہ کرنے کا الزام لگا رہی ہے۔رافیل کو لے کر سی اے جی کی رپورٹ پر اب معاملہ گرم ہوگیا ہے اور کانگریس مودی حکومت پر حملہ آور ہے۔ہفتہ کو ایک بار پھر سے کانگریس کے سینئر لیڈر کپل سبل نے کہا کہ سپریم کورٹ میں غلط حقائق دینے کے لیے حکومت ذمہ دار ہے۔کپل سبل نے کہا کہ حکومت سپریم کورٹ میں غلط حقائق دینے کے لیے ذمہ دار ہے۔مجھے لگتا ہے کہ اٹارنی جنرل کو پی اے سی کے سامنے آناچاہیے اور یہ پوچھا جانا چاہیے کہ غلط حقیقت کیوں پیش کیے۔یہ کافی سنگین معاملہ ہے۔کپل سبل نے کہا کہ ہم بہت یقینی طور پر کہہ سکتے ہیں کہ سپریم کورٹ ایک مناسب فورم نہیں تھا جس پر ان مسائل کافیصلہ کیا جا سکتا ہے کیونکہ یہاں نہ تو سپریم کورٹ نہ ہی فائلوں کی جانچ کر سکتے ہیں اور نہ ہی گواہوں کے حلف نامہ کی جانچ کر سکتے ہیں۔ساتھ ہی سپریم کورٹ وزیر اعظم کو بلا کر پوچھ گچھ بھی نہیں کر سکتا، جبکہ ہمیں اس پر وزیر اعظم سے سوال کرنے کی ضرورت ہے۔کپل سبل نے کہاکہ میں نے ایک دوربین خریدنے کے لئے کہا ہے اور مجھے اس بی جے پی صدر امت شاہ کوگفٹ کرنا ہے۔بی جے پی صدر نے کہا تھا کہ اسمبلی انتخابات کے بعد کانگریس کو دوربین سے دیکھنا پڑے گا۔