بنگلورو،30؍نومبر(ایس او نیوز) سینئر بی جے پی لیڈر اور رکن اسمبلی کے ایس ایشورپا نے کہا ہے کہ جس دن ریاستی کابینہ میں توسیع ہوگی اسی دن کمار سوامی حکومت گر جائے گی۔

اخباری نمائندوں سے بات چیت کرتے ہوئے انہوں نے کہاکہ بی جے پی کی طرف سے اس حکومت کو گرانے کے لئے کسی طرح کے آپریشن کمل کی کوئی ضرورت نہیں بلکہ وزارت سے محروم اراکین اسمبلی خود اس حکومت کا بیڑہ غرق کردیں گے۔ انہوں نے کہاکہ اقتدار کے لالچ میں کانگریس اور جے ڈی ایس نے اتحاد تو کرلیا ہے ، لیکن یہ دونوں پارٹیاں آپس میں تال میل قائم کرنے میں اب تک کامیاب نہیں ہوئی ہیں۔

انہوں نے کہاکہ وزارت کے لئے دن رات زور لگانے والے اراکین اسمبلی اگر وزارت کا حصہ نہ بن پائیں تو وہ کسی بھی حال میں حاموش نہیں بیٹھیں گے جس کے نتیجے میں اس حکومت کا گرنا طے ہے۔ انہوں نے کہاکہ اپنے آپ کو سیکولر کہنے والے پارٹیوں نے اقدار کی دھجیاں اڑائی ہیں ، چامنڈیشوری حلقے میں جے ڈی ایس کے ہاتھوں رسوا کن شکست کھانے والے سدرامیا بے شرمی سے جے ڈی ایس کے وزیراعلیٰ کے ساتھ کام کررہے ہیں۔

انہوں نے کہاکہ سدرامیا میں اگر تھوڑی سی بھی خود داری ہوتی تو وہ اس اتحاد کو کبھی تسلیم نہیں کرتے، انہوں نے کہاکہ قومی سطح پر پہلے ہی زوال پذیر کانگریس کرناٹک میں اس حد تک گر جائے گی اس کا تصور بھی نہیں کیا جاسکتاتھا، لیکن آج کانگریس جس حالت میں ہے اسے دیکھ کر اس پر ترس آتا ہے۔ ایشورپا نے کہا کہ ریاست میں صرف دیوے گوڈا اور ریونا کا کاروبار چل رہاہے، حکومت میں کسی کو کچھ بھی فیصلہ لینے کا کوئی اختیار نہیں۔ انہوں نے دعویٰ کیا کہ آنے والے لوک سبھا انتخابات میں بی جے پی زیادہ نشستوں پر کامیابی حاصل کرے گی۔