بورویل حادثوں کے لئے ریاستی حکومت ذمہ دار کاویری کو زندہ نکالنے کی کوششیں جاری
بنگلورو:23؍اپریل(ایس او نیوز؍صدیق آلدوری) بلگام ضلع اتھنی تعلقہ کے جھنجرواڈ دیہات کی مضافات میں زیر کھدائی بورویل کے کھڈمیں گرچکی 6؍سالہ کاویری کو اس بورویل سے زندہ باہر نکالنے کی کوشش ہنوز جاری ہے۔ کاویری گزشتہ 24؍گھنٹوں سے اس بورویل کے کھڈ میں پھنسی ہوئی ہے اور اسے زندہ باہر نکالنے کے لئے نیشنل ڈیزاسٹرس ہیلپ ٹیم، فائر فورس، ہٹی گولڈ مائنز کی ریسکیو ٹیم اور ہیلپ لائن سے جڑے 500 سے زائد افراد کام پر لگے ہوئے ہیں اور ہرکوئی یہ دعا کررہا ہے کہ یہ بچی زندہ سلامت اس بورویل سے باہر نکال لی جائے۔ درین اثناء ہبلی میں آج اس حادثہ پر افسوس ظاہر کرتے ہوئے ریاستی اسمبلی میں اپوزیشن بھارتیہ جنتا پارٹی (بی جے پی) لیڈر سابق وزیر اعلیٰ جگدیش شٹر نے ایک بیان میں کہاہے کہ کرناٹک میں باربار ایسے حادثات رونما ہورہے ہیں۔ اس کے لئے ریاستی حکومت ہی ذمہ دار ہے۔ انہوں نے کہاکہ جب کہیں بورویل کھودا جاتاہے اور وہ ناکام رہ جائے تو اسے فوری طورپر بند کردینے کی جانب ریاستی حکومت اور ضلع انتظامیہ کو توجہ دینی پڑتی ہے۔ لیکن افسروں کی لاپروائی اور حکومت کی عدم توجہ سے ایسے حادثات رونما ہورہے ہیں۔ عام طورپر بورویل کھودنے والی کمپنیوں پر یہ شرط عائد ہوتی ہے کہ بورویل کھدائی کے بعد پانی نہ ملے تو اسے فوراً بندکردیں۔ اس وقت کمسن کاویری کی جان بچانے کی ہرممکن کوشش کی جانی ہے اور آئندہ ریاست میں ایسے حادثات نہ ہوں اس پر سخت نگاہ رکھنے کی ضرورت ہے۔