حکومت تمام شہریوں کو علاج کی سہولت فراہم کرنے کی پابند: وزیر اعلیٰ سدارامیا
بنگلورو،16/ستمبر(ایس او نیوز) ریاستی وزیر اعلیٰ سدارامیا نے یہاں کہا کہ آبادی زیادہ ہو تو بیماریاں بھی زیادہ ہوتی ہیں۔اس لئے بیماری کاپتہ چلتے ہی بروقت علاج کروانے سے بیماری سے چھٹکارا مل جاتاہے۔ تمام شہریوں کو علاج کی سہولت ملنی چاہئے۔ حکومت کا مقصد بھی یہی ہے۔ ریاست کے تمام شہریوں کو علاج کی سہولت فراہم کرنے کی حکومت پابند ہے۔ شہر کے وانی ولاس اسپتال میں ہائی ٹیک ریسرچ سنٹر عمارت کا افتتاح کرنے کے بعد خطاب کرتے ہوئے وزیر اعلیٰ نے یہ بات کہی۔ انہوں نے کہا ’’ اس سہولت سے غریبوں کے علاج میں مدد ملے گی۔ میں خود بھی ذیابطیس کا ایک مریض ہوں۔ ایسے مریضوں کے علاج میں یہاں مدد ملے گی۔‘‘ انہوں نے بتایا کہ ذیابیطس میں اگر ٹھیک سے دیکھ بھال کی جائے تو مریض زیادہ دنوں تک جی سکتا ہے۔ اس تقریب میں وزیر برائے طبی تعلیم شرناپرکاش پاٹل رکن اسمبلی بی زیڈ ضمیر احمد خان، سماجی کارکن ایوب خان اور دیگر بھی حاضر رہے۔