نئی دہلی:24/مارچ(ایس او نیوز/آئی این ایس انڈیا)مہاراشٹر میں سیکورٹی کے مطالبہ کو لے کر چل رہی ڈاکٹروں کی ہڑتال کی حمایت میں دہلی کے ریسیڈنٹ ڈاکٹروں کی ہڑتال کے بعد وزیر صحت جے پی نڈا نے مہاراشٹر حکومت سے ڈاکٹروں کو مناسب سیکورٹی فراہم کرنے کی اپیل کی ہے۔مرکزی وزیر صحت جے پی نڈا نے ڈاکٹروں سے اپیل کرتے ہوئے کہا کہ وہ کام پر واپس آئیں۔ساتھ ہی ریاستی حکومت کو ہدایت دی کہ وہ ڈاکٹروں کو سیکورٹی مہیا کرائیں۔اس سے پہلے پیر کو بی جے پی کے راجیہ سبھا ممبر پارلیمنٹ ڈاکٹر وکاس مہاتمے نے بھی راجیہ سبھا میں ڈاکٹروں کے ساتھ مار پیٹ کرنے والوں کے خلاف سخت کارروائی کرنے کامطالبہ کیا تھا۔وکاس مہاتمے نے اپنے بیان میں کہا تھا کہ کوئی ڈاکٹر جان بوجھ کر مریضوں کو نقصان نہیں پہنچاتا ہے، پھر بھی ڈاکٹروں کے خلاف مسلسل حملے بڑھتے جا رہے ہیں، جس پر حکومت کو توجہ دینے کی ضرورت ہے۔غور طلب ہے کہ ممبئی میں ڈاکٹروں کے خلاف حال ہی میں ہوئے تشدد کے بعد ملک بھر کے ڈاکٹر ہڑتال پر جانے کی بات کہہ رہے ہیں۔دہلی میں واقع آل انڈیا انسٹی ٹیوٹ آف میڈیکل سائنسز (ایمس)کے ترجمان ڈاکٹر امت گپتا نے اس معاملے پر کہا کہ ڈاکٹر کا یونین ممبئی میں ہوئے اس حملے کی مذمت کرتا ہے۔مہاراشٹر کے کچھ اسپتالوں میں ڈاکٹروں کے ساتھ مار پیٹ کے واقعات مسلسل سامنے آ رہے ہیں۔اتوار کوساین اسپتا ل میں ایک مریض کی موت کے بعد مریض کے تیمارداروں نے ایک ڈاکٹر کے ساتھ مبینہ طور پر مارپیٹ کی تھی۔ڈاکٹروں کا کہنا ہے کہ ہم اپنی جان خطرے میں ڈال کر مریضوں کا علاج نہیں کر سکتے ہیں۔