بنگلورو یکم ؍فروری (ایس او نیوز) بی جے پی کے سینئر لیڈر ایشورپّا نے ایک نیا متنازع شوشہ چھوڑتے ہوئے مسلمانوں کو دو ٹکڑوں میں تقسیم کیا ہے اور بی جے پی کے ساتھ آنے والوں کو’ اچھے مسلمان‘ اور کانگریس کا ساتھ نبھانے والوں کو’ قاتل مسلمان‘ کا لیبل لگادیا ہے۔

ایشورپّا نے ٹمکورو میں اخباری نمائندوں سے گفتگو کے دوران کہا کہ’’ وہ مسلمان جنہوں نے آر ایس ایس اور بی جے پی کے 22اراکین کو قتل کیا تھا وہ کانگریس کے ساتھ ہیں۔ اور جو اچھے کرداروالے مسلمان ہیں وہ سب بی جے پی کے ساتھ ہیں۔جو قاتل ہیں وہ کانگریس کے ساتھ ہیں۔‘‘یاد رہے کہ بی جے پی کانگریس پر ہمیشہ یہ الزام لگاتی رہی ہے کہ وہ پاپولر فرنٹ اور اس کے سیاسی بازو سوشیل ڈیموکریٹک پارٹی آف انڈیا کی پشت پناہی کررہی ہے، جو کہ کرناٹکا میں سنگھ پریوار کے رضاکاروں کو نشانہ بنانے میں مصروف ہے۔

ایشورپا نے وزیر اعلیٰ سدارامیا اور وزیر داخلہ رام لنگا ریڈی سے مطالبہ کیا کہ وہ اے آئی ایم آئی ایم کے چیف اسدالدین اویسی کے ساتھ بی جے پی کی ساز باز ہونے کے ثبوت عوام کے سامنے پیش کریں۔اس سے دو دن قبل وزیر داخلہ نے الزام لگایا تھا کہ بی جے پی اور اویسی کے درمیان خفیہ سازباز ہوئی ہے۔ ایشورپّا نے کہا کہ اگر وزیراعلیٰ اور وزیر داخلہ اس بات کے ثبوت نہیں پیش کرسکتے تو انہیں اپنے منصب سے استعفیٰ دے دینا چاہیے۔انہوں نے ریاستی سرکار پر مزید الزام لگاتے ہوئے کہا کہ کانگریس عوام کے اندر پھوٹ ڈالنے والی سیاست کررہی ہے،کیونکہ کرناٹکا میں ترقی کے موضوع پر بولنے کے لئے اس کے پاس کچھ بھی موجود نہیں ہے۔