کاروار یکم دسمبر (ایس او نیوز) کدرا کے دو معروف بینکوں کو نقلی سونا گروی رکھ کر لاکھوں روپے کا دھوکہ دینے والا راجکمارشیٹھ بالآخر پولیس کی گرفت میں آگیا ہے۔ موصولہ رپورٹ کے مطابق میں راجکمار تھمپّا شیٹھ ملاپور میں واقع سنڈیکیٹ بینک اور اسٹیٹ بینک آف میسور میں پچھلے کچھ برسوں سے گروی رکھے جانے والے سونے کی جانچ پر مامور تھا اور اس نے اپنے عہدے کا ناجائز استعمال کرتے ہوئے بعض دیہاتیوں کے نام پرسونا گروی رکھتے ہوئے ان بینکوں سے 79الگ الگ معاملات میں جملہ 94لاکھ روپے قرضہ حاصل کیا تھا۔ 

جب یہ قرضہ واپس نہیں لوٹا یا گیا توبینک کے افسران نے اس سونے کو نیلام کرنے کا فیصلہ کیا۔تب جاکر پتہ چلا کہ یہ سارا سونا نقلی ہے۔اس سے پہلے کہ راجکمار کے خلاف اقدام کیا جاتا وہ اپنے اہل خانہ کے ساتھ فرار ہوچکا تھا۔پولیس میں شکایت درج کرنے کے بعد اس معاملے کی تحقیقات اورراجکمار کی گرفتاری کے لئے کدرا پولیس انسپکٹر کو ذمہ داری سونپی گئی، لیکن چونکہ راجکمار اپنے موبائل فون کا نمبر تبدیل کیا کرتاتھا اس لئے اس کو گرفت میں لینا مشکل ہوگیا تھا۔ بالآخر یلاپور میں ملزم راجکمار شیٹھ کو پولیس نے گرفتار کرلیا اور کاروار کی عدالت میں پیش کیا جہاں سے اس کو عدالتی حراست میں بھیج دیا گیا ہے۔