گوکرن مندر معاملہ :سپریم کورٹ نے دیاموجودہ حالت برقرار رکھنے کا حکم
کاروار4؍اکتوبر (ایس او نیوز)گوکرن کے مہابلیشور مندر کا تنازعہ پھر ایک بار عدالتی کارروائی کا شکار ہوگیا اور سپریم کورٹ کے حکم کے مطابق اس کی موجودہ حالت(status quo) برقرار رکھناضروری ہوگیا جس کے نتیجے میں یہ مندر پھر ایک بار رامچندرا پور مٹھ کی تحویل میں چلا گیا۔
خیال رہے کہ کچھ دنوں پہلے ریاستی حکومت کے مزراعی محکمہ کی طرف سے اس مندر کو رامچندرا پور مٹھ کی تحویل سے واپس لینے کی کارروائی کا آغاز ہواتھا اور ضلع شمالی کینرا کے ڈپٹی کمشنر کی قیادت میں مندر انتظامیہ کمیٹی تشکیل دینے کی بات کہی گئی تھی۔
لیکن اس مسئلے پر رامچندراپور مٹھ کی طرف سے سپریم کورٹ میں حکومت کے خلاف توہین عدالت کا معاملہ درج کرواتے ہوئے کہا گیا تھا کہ مندر کو تحویل میں لیتے ہوئے ریاستی حکومت نے ہائی کورٹ کے عبوری فیصلے کی توہین کی ہے جس میں مندرکا انتظام و انصرام رامچندر پور مٹھ کے ماتحت رکھنے کو کہا گیا تھا۔ اس درخواست کی سماعت جسٹس کورین جوزف اور جسٹس اے ایم کھانویلکر کی بینچ نے کی اور آئندہ حکم جاری ہونے تک مندر کا انتظام رامچندرا پور مٹھ کے تحت ہی رہے۔ کیس کی اگلی سماعت چار ہفتوں بعد رکھی گئی ہے۔