صحافت سماج کا آئینہ ہے تو صحافی حقیقت نگار ہے؛ گوکرن میں منعقدہ ’یوم صحافت‘ میں معروف ادیب جینت کائیکنی کا تبصرہ
بھٹکل:16/جولائی (ایس اؤ نیوز) شمالی کینرا ضلع ورکنگ جرنلسٹ ایسوسی ایشن کی جانب سے گوکرن میں واقع برہمن پریشد سبھا بھون میں منعقدہ ’یوم صحافت‘ اور صحافیوں کو ایوارڈ تفویض کرنے کے موقع پر خطاب کرتے ہوئے معروف کنڑا ادیب جینت کائیکنی نے کہا کہ ادب اورلٹریچر اگر ایک بہت ہی بڑا درخت ہے تو صحافت اس کی ایک گھنی شاخ ہے۔صحافت ہمارے سماج کی صحت کا کارڈیو گرام(ای سی جی) ہے ۔ جینت کائیکنی نے اپنے خطاب میں مزید کہا کہ صحافی کو سماج او ر ذات پات سے بلند ہوکر انسانیت کے مفاد کو پیش نظر رکھنا چاہیے۔روزانہ کی عام زندگی سے غیر معمولی زاویوں کو ڈھونڈ نکالنا اور انسانی عزت و تکریم کے لئے مصروف عمل رہنے والا سچا صحافی ہوتا ہے۔ کنڑا ادیب نے کہاکہ صحافی اور ڈاکٹر کو ہمیشہ انسانیت کی حمایت میں کام کرنا چاہئے۔ انہوں نے خیال ظاہر کیا کہ موجودہ دور کے صحافیوں میں مطالعہ کی کمی ہے، حالانکہ ادب کے مطالعہ سے ہی انسانیت پرورش پاتی ہے ،آگے کہا کہ انسانی نقطہ نظر سے شائع کی جانے والی خبریں سماج کے لئے معاون ہوتی ہیں۔انہوں نے اپنے خطاب میں کوئمپو کی نظم ’پتریکا وارتے‘ کا خلاصہ بڑے ہی خوبصورت انداز میں پیش کیا۔
کمٹہ کے ایم ایل اے دینکر شیٹی نے چراغ جلاکر پروگرام کا افتتاح کیا۔ انہوں نے اپنے خطاب کے دوران کہا کہ سماج کو سدھارنے اور اس کی اصلاح کرنے کی طاقت صحافت کے اندر موجود ہے۔حقیقت پر مبنی خبروں کی ترسیل سے ہی یہ کام ممکن ہوسکتا ہے۔صبح کو بننے والی خبر شام کو مسترد نہ ہوجائے اس بات کا خیال رکھ کر اگر کوئی نامہ نگاری کرتا ہے تو اس سے اس صحافی کا وقار بڑھتا ہے۔ دینکر شٹی کے مطابق الیکٹرانک میڈیا کی تیز رفتاری کے باوجود پرنٹ میڈیا کے فروغ میں اس پہلو کا بہت بڑا رول ہے۔صحافت کا پیشہ بہت ہی وسیع اور قدیم ہے۔ ضلع شمالی کینرا کو اس بات کا فخر ہے کہ صدیوں سے یہاں صحافت کو فروغ ملتا رہا ہے۔ کمٹہ رکن اسمبلی نے اس موقع پر صحافیوں کی عمارت کی تعمیر کے لئے اپنی جانب سے ہر ممکنہ تعاون دینے کاتیقن دیا۔
اس موقع پرراجیو اجّیبل کی تصنیف ’شمالی کینرامیں صحافت کے سو سالہ نقوش‘ کی رسمِ اجراء ورکنگ جرنلسٹ ایسو سی ایشن کے ریاستی صدر این راجیو کے ہاتھوں انجام دی گئی۔ انہوں نے کہا کہ ریاستی ، ضلعی اور مقامی سطح پر جو لوگ پیشۂ صحافت سے وابستہ ہیں ان کے تحفظ، ترقی اور فلاح و بہبود کے لئے حکومت کو منصوبے بنانے چاہئے۔
یوم صحافت کے اس خصوصی موقع پر کنڑا وجئے وانی اخبار کے صحافی شریدھر اڈی کو’ کے شیام راؤ ایوارڈ‘کے علاوہ ساحل آن لائن بھٹکل کے عنایت اللہ گوائی اور جوئیڈا کے پانڈو رنگا پٹگار کو ’اجّیبل ایوارڈ‘ تفویض کیا گیا ۔سینئر اخباری ایجنٹ اور سپلائر گجانن دیوٹیگے کی تہنیت بھی کی گئی۔ ایوارڈ قبول کرنے کے بعد شریدھر اڈی نے سینئر ایڈیٹر کے شیام راؤ کی شخصیت اور ان کی خوبیوں پر اظہار خیال کیا ۔اس کے علاوہ پیشۂ صحافت سے وابستہ رہنے میں ان کی پشت پناہی کرنے والے کئی سینئر صحافیوں کا شکریہ اداکیا۔سانی کٹّے ہائی اسکول کے صدر ناگراج ہیتل مکّی اور اخبار سپلائر گجانن دیوٹیگے نے بھی اس موقع پر اپنے اپنے تاثرات پیش کئے ۔
پروگرام کی صدارت ورکنگ جرنلسٹ ایسو سی ایشن کے ضلع صدر سبرایا بھٹ بکّل نے کی۔ صحافی مہابلا اپادھیائے نے استقبال کیادھنیا اور بھارگوی نے استقبالیہ گیت گایا۔ صحافی کرشنا مورتی ہیبار نے تعارف پیش کیا۔ ایسو سی ایشن کی ضلع خزانچی سندھیا ہیگڈے اور گجانن نائک نے نظامت کی۔صحافی روی سوری نے شکریہ ادا کیا۔سینئر جرنلسٹ راجیو اجّیبل، ورکنگ جرنلسٹ ایسوسی ایشن کے سکریٹری پردیپ شیٹی، رکن عاملہ رادھا کرشنا بھٹ، برہمن پریشد کے صدر چندر شیکھر اڈی، پی ایس آئی سنتوش کمار وغیرہ اسٹیج پر موجود تھے، جبکہ ضلع کے مختلف علاقوں کے صحافی سمیت بھٹکل سے ساحل آن لائن کے ڈائرکٹر قمر سعدا، معاونین صدیق محتشم، ابوبکر مالکی سمیت کافی لوگ پروگرام میں شریک ہوئے تھے۔