گوکرن سمندری موجوں میں پھنسی غیر ملکی سیاح کو بچالیا گیا؛ لائف گارڈ کی ستائش
گوکرن :4/مئی (ایس اؤنیوز) شام کےوقت ساحل سمندر پر ایک غیر ملکی سیاح جب سمندر میں تیرنے کے دوران بیچ سمندر میں بری طرح پھنس گئی تو خطرناک موجوں کی پرواہ نہ کرتے ہوئے سیاح کو بحفاظت ساحل پر پہنچا کر لائف گارڈ نے حوصلہ مند کام انجام دینے کا واقعہ گوکرن کے کوڈلے بیچ پر پیش آیا ہے۔
ریاست گوا کی اپنی ایک سہیلی کے ساتھ گوکرن پہنچی فرانس کی دیبوؤ وارینو(22)نامی بیرونی سیاح کوڈلے بیچ پر شام کو سمندرمیں تیررہی تھی ۔ دونوں سہلیاں تیرتے ہوئے قریب 200میٹر سے بھی دور نکل گئے ، شام کا وقت تھا ہوا زور سے چلنے لگی تو موجیں اونچی اونچی اٹھنے لگیں تو تیرنا محال ہوکر دونوں سہیلیاں موجوں کی لپیٹ میں آتی چلی گئیں ایسے میں گوا کی مکین دیبو کی سہیلی جوں توں کرکے ساحل تک پہنچنے میں کامیاب ہوگئی، لیکن فرانس کی سیاح دیبوؤ مارینوبیچ سمندر میں بری طرح پھنس گئی اور ہاتھوں کے اشارے سے مدد طلب کرنے لگی۔ یہ دیکھ کر اُس کی سہلی نے مدد کے لئے چلانا شروع کردیا، ایسے میں ساحلی کنارے پر ضلعی انتظامیہ کی طرف سے تقررکردہ لائف گارڈ مہیش ہری کنتر ڈیوٹی پر تھا جس نے مدد کی پکار سنتے ہی سمندر ی لہروں کو چیرتے ہوئے بڑی سرعت کے ساتھ بیچ سمندر میں پہنچ گیا اور سیاح کوپکڑ کر ساحل پر لاکر جان بچائی ۔ بتایا جارہا ہے کہ سمندری موجیں اتنی اونچی اُٹھ رہیں تھیں کہ ایسے حالات میں بوٹوں پر چلنا بھی مشکل تھا، لیکن ایسے حالات میں جان کی پرواہ نہ کرتے ہوئے 200میٹر کی دوری تک تیرتے ہوئے جاکر سیاح کو بچالائے لائف گارڈ مہیش ہری کنتر کے حوصلے کو مقامی شہریوں کے ساتھ سیاح نے بھی ستائش کی ۔