کنداپور میں کھیلتے وقت اچانک تالاب میں گرجانے سے 11سالہ لڑکی فوت
کنداپور 26؍مئی (ایس او نیوز)کوڈابائیل نامی مقام پر ایک جھیل کے پاس پینے کے پانی کے لئے بنائے گیے تالاب میں پھسل کرگرنے سے 11سالہ لڑکی کی موت واقع ہوگئی ہے۔
تالاب کے قریب کھیلتے ہوئے حادثاتی طور پر پانی میں گرنے اور ڈوب کر ہلاک ہونے والی لڑکی کی شناخت سواتھی کی حیثیت سے کی گئی ہے جس نے امسال پانچویں جماعت کا امتحان پاس کیاتھا۔ذرائع سے ملی اطلاع کے مطابق تھوبٹّو جھیل پوری طرح سوکھ جانے سے اس کے قریب مقامی لوگوں نے پینے کا پانی حاصل کرنے کے لئے وہیں پر ایک تالاب کھودا تھا، جودوسرے بچوں کے ساتھ کھیلنے کے لئے جانے والی سواتھی کی موت کا سبب بن گیا۔
بتایا جاتا ہے کہ اس کے ساتھ کھیلنے والے دوسرے بچے یہ سمجھتے رہے کہ سواتھی کہیں جھاڑیوں میں چھپ گئی ہے۔ وہ اسے تلاش کرتے ہوئے اس کے گھر تک پہنچے ۔ تب اس کے گھر والوں نے بھی اسے تلاش کرنا شروع کیا۔ کافی دیر تک تلاش کرنے کے بعدسواتھی کی لاش تالاب میں دستیاب ہوئی۔
کنداپور سرکل پولیس انسپکٹر منجپّااور پی ایس آئی سنیل کمار نے اپنے عملے کے ساتھ موقع پر پہنچ کر معائنہ کیا۔ شنکرنارائن پولیس اسٹیشن میں کیس درج کرلیا گیا ہے۔