جنرک میڈیکل اسٹورس میں دوائیوں کی مانگ پوری کی جائیگی منظم نیٹ ورک کے ذریعہ دوائیاں تقسیم کرنے کیلئے نیا سافٹ ویر تیار ہوگا : اننت کمار
بنگلورو 24 جون ( ایس او نیوز) مرکزی حکومت کی طرف سے قائم کردہ جنرک میڈیکل اسٹورس میں دوائیوں کی مانگ میں جو دن بہ دن اضافہ ہورہاہے اس کے متعلق مرکزی حکومت کو حال ہی میں اطلاع ملی ہے ۔ مزید ایک ماہ میں یہ مسئلہ حل کرلیا جائے گا۔ مرکزی وزیر اننت کمار نے یہ بات بتائی ۔
شہر میں کل انہوں نے میڈیا کو بتایا کہ جنرک میڈیکل اسٹورس میں کم قیمت میں معیاری دوائیاں دستیاب ہیں اس لئے لوگ زیادہ سے زیادہ دوائی خرید کر لے جارہے ہیں جس کے نتیجہ میں میڈیکل اسٹورس میں ان دوائیوں کی قلت پیش آرہی ہے ۔ اس پر قابو پانے کیلئے وقت لگے گا ۔ منظم نیٹ ورک کے ذریعہ دوائیاں تقسیم کرنے کیلئے سیاپ نامی سافٹ ویر تیار کیا جارہا ہے اس کے ساتھ ہی دوائیوں کی پیداوار میں اضافہ کرنے کیلئے مناسب اقدامات کئے جارہے ہیں۔ انہوں نے بتایا کہ نریندر مودی کی قیادت والی این ڈی اے حکومت اقتدار میں آنے کے بعد گزشتہ چار سالوں میں 550اضلاع میں 3608 جنرک میڈیکل اسٹورس قائم کئے گئے ہیں ۔ اس سے قبل ان میڈیکل اسٹورس میں صرف100 نمونوں کی دوائیاں دستیاب تھیں اب 600 سے زائد نمونے کی دوائی ، 150 سے زائد صحت کے متعلق ساز و سامان فروخت کیلئے رکھے گئے ہیں ۔اس سے قبل جنرک میڈیکل اسٹورس میں سالانہ 3 کروڑ روپئے کاروبار ہوتا تھا جبکہ اب وہ 400 کروڑ تک پہنچ گیا ہے ۔ انہوں نے مزید بتایاکہ نہ صرف غریب بلکہ تمام طبقہ کے لوگ جنرک میڈیکل اسٹورس سے دوائیاں خرید تے ہیں ۔ جس کے نتیجہ میں دوائیوں کی قلت کا مسئلہ پیش آرہاہے ۔ اس مسئلہ کو حل کرنے کیلئے مرکزی حکومت کی طرف سے مناسب اقدامات کئے جارہے ہیں ۔