گوری لنکیش کے قتل میں ہندو انتہا پسند تنظیم کا ہاتھ ؛خصوصی تحقیقاتی ٹیم کو سناتن سنستھا کے کارکنوں کی تلاش
بنگلورو،6؍اکتوبر(ایس او نیوز؍عبدالحلیم منصور) معروف صحافی گوری لنکیش کے قتل کی جانچ میں مصروف خصوصی تحقیقاتی ٹیم نے شبہ ظاہر کیا ہے کہ گوری کا قتل ہندو انتہا پسند تنظیم سناتن سنستھا کی طرف سے کروایا گیا ہوگا۔ تحقیقات کے ذریعہ یہ بات سامنے آئی ہے کہ گوری لنکیش کے قتل میں ہندو انتہا پسند تنظیم سے وابستہ کارکنان پروین لمکارکولاپور، جئے پرکاش منگلور، سارنگ اکول کارپونے اور ردرا پاٹل سانگلی اور ونئے پوار ستارا نے کلیدی رول ادا کیا ہے۔ خصوصی تحقیقاتی ٹیم نے ان تمام ملزمین کی بڑے پیمانے پر تلاش شروع کردی ہے۔ 2009میں گوا کے مڑگاؤں میں ہوئے بم دھماکے کے سلسلے میں ان میں سے چار ملزم تحقیقاتی ایجنسیوں کو مطلوب ہیں اور ان کی گرفتاری کیلئے عالمی تحقیقاتی ایجنسی انٹر پول کی طرف سے ریڈ کارنر نوٹس جاری کیا گیا ہے۔ گوری لنکیش کو مارنے کیلئے جن گولیوں کا استعمال کیا گیا ہے اور ساتھ ہی جو چار گولیاں ضائع کی گئی ہیں، ان تمام کی جانچ کے بعد فورنسک لیاب میں یہ نتیجہ اخذ کیاگیا ہے کہ یہ وہی گولیاں ہیں جو معروف کنڑا ادیب ایم ایم کلبرگی کو مارنے کیلئے استعمال کی گئی تھیں۔