یلاپورمیں گیس ٹینکر اور ٹرک کے درمیان تصادم
یلاپور، 8؍اکتوبر(ایس او نیوز) نیشنل ہائی وے 63پر یلاپور کے قریب اریبیل گھاٹ کے ایک کراس پر گیس سے بھرے ہوئے ٹینکر اور سامان سے لدے ہوئے ٹرک کے درمیان خطرناک تصادم ہوگیا۔
موصولہ رپورٹ کے مطابق انڈین گیس کا ٹینکر منگلورو سے ہبلی کی طرف جارہا تھا اس وقت بڑی تیز رفتاری سے آنے والی گوڈس لاری ٹینکر کے ساتھ سامنے سے ٹکرا گئی۔تصادم کی وجہ سے ٹینکر کا ڈرائیور اپنے کیبن میں ہی پھنس کر رہ گیاجبکہ کلینر کو کسی قسم کی چوٹ نہیں آئی۔۔ بڑی مشقت کے بعد زخمی ڈرائیور کو باہرنکالا جاسکا اور ایمبولینس کے ذریعے اسپتال روانہ کردیا گیا۔ بتایا جاتا ہے کہ حادثے کے بعد ٹرک ڈرائیور اور کلینر موقع سے فرار ہوگئے۔کچھ دیر کے لئے اس علاقے میں گاڑیوں کی آمد ورفت میں خلل واقع ہوگیااور شاہراہ کے دونوں جانب موٹر گاڑیوں کی قطاریں لگ گئیں۔
گیس ٹینکر میں گیس بھری ہونے کی وجہ سے علاقے میں بڑے حادثے کے امکانات پر قابو پانے کے لئے سرکل پولیس انسپکٹر ڈاکٹر منجو ناتھ نائک کی قیادت میں پولیس اور فائر بریگیڈ عملے نے احتیاطی اور حفاظتی انتظامات کیے۔