مینگلور19/جنوری (ایس او نیوز) یہاں پڈیل۔ مرولی ہائی وے پر ایک گیس سے بھری ٹینکر اُلٹ جانے سے گیس رسنا شروع ہوجانے کے بعد نیشنل ہائی وے کو پولس نے بند کردیا ہے جس کے نتیجے میں سڑک کے دونوں کنارے ٹریفک نظام درہم برہم ہوگیاہے ۔ بتایا گیا ہے کہ پولس نے حفاظتی اقدامات کے تحت آس پاس کے سبھی علاقوں کے مکینوں کو خبردار کیا ہے کہ وہ آگ کا استعمال نہ کریں اور ٹینکر کا معاملہ مکمل طور پر قابو میں آ نے تک احتیاط برتیں۔
حادثہ سنیچر دوپہر کو اُس وقت پیش آیا، جب گیس سے بھری ٹینکر مینگلور سے بنگلور کی طرف جارہی تھی کہ ہائی وے پر ٹینکر اُلٹ گئی۔
واردات کی اطلاع ملتے ہی پولس سمیت فائر بریگیڈ موقع واردات پر پہنچ گئے اور ضروری اقدامات شروع کردئے۔ بتایا گیا ہے کہ ٹینکر اُلٹنے کے نتیجے میں گیس رسنے کا خدشہ ظاہر کیا جارہا تھا جس کو دیکھتے ہوئے پولس نے فوری طور پر ہائی وے کو عارضی طور پر بند کردیا تھا، بعد میں اس بات کی تصدیق ہوگئی کہ واقعی میں گیس رسنا شروع ہوگیا ہے، جس کے فوری بعد احتیاطی اقدامات اُٹھائے گئے ہیں۔ اس بات کا پتہ نہیں چل پایا ہے کہ ہائی وے کب تک بند رکھا جائے گا اور معاملہ کب تک نپٹے گا۔
حادثے کے تعلق سے مزید جانکاری موصول ہونی باقی ہے۔