بھٹکل میں ٹمپو سے ٹکرانے کے بعد گیس سے بھری ٹینکر اُلٹ گئی؛ گیس رسنےکے خدشے سے عوام میں خوف
بھٹکل یکم فروری (ایس او نیوز) تعلقہ کے سرپن کٹہ نیشنل ہائی وے 66 پر سڑک کے ایک موڑ کے قریب گیس سے بھری ٹینکر بے قابو ہوکر ایک ٹمپو سے ٹکرانے کے بعد اُلٹ گئی جس کے نتیجے میں اطراف کے عوام میں گیس رسنے کے خدشے سے خوف طاری ہوگیا، مگر اچھا ہوا کہ ٹینکر نیچے گرنے کے باوجود گیس کا اخراج نہیں ہوا۔ حادثہ جمعہ کی صبح قریب سات بجے پیش آیا۔
اطلاع کے مطابق گیس سے بھری ٹینکر مینگلور سے دھارواڑ جارہی تھی ، جبکہ ٹمپو بھٹکل ٹاون سے گورٹے کی طرف جارہی تھی۔ ٹکر لگتے ہی ٹمپو بے قابو ہوکر قریبی دکان میں گھس گئی۔ ٹمپو میں کوئی مسافر سوار نہ ہونے کی وجہ سے بڑا حادثہ ٹل گیا، البتہ ٹمپو ڈرائیور شدید زخمی ہوگیا جسے مقامی اسپتال میں طبی امداد کےبعد منی پال روانہ کیا گیا ہے۔ بتایا گیا ہے کہ اس کا ایک پاوں بری طرح فریکچر ہوگیا ہے۔ زخمی ٹمپو ڈرائیور کی شناخت بیلکے کے رہنے والے نرسمہا مادیو نائک (39) کی حیثیت سے کی گئی ہے۔ حادثے میں ٹینکر کے ڈرائیور کو معمولی چوٹ آئی ہے، جس کی شناخت تمل ارسن (29) کی حیثیت سے کی گئی ہے۔
ٹمپو سے ٹکر لگتے ہی ٹرک سے ٹینکر کا پورا حصہ الگ ہوکر ہائی وے پر جاگرا، جس کی وجہ سے مقامی لوگوں میں خوف گھر کرگیا کہ ٹینکر سے گیس کا اخراج شروع ہوسکتا ہے، ٹینکر سڑک پر گرنے کی اطلاع ملتے ہی پولس سمیت فائر بریگیڈ کا عملہ بھی جائے وقوع پر پہنچ گیا اور حفاظتی انتظامات کے تعلق سے ضروری کاروائی کی گئی۔
ٹینکر کو سڑک سے اُٹھانے کے لئے مینگلور بھارت گیس کمپنی کے اہلکاربھٹکل کے لئے روانہ ہوگئے ہیں، فی الحال حفاظتی انتظامات کے پیش نظر پولس اور فائر بریگیڈ کے عملے کو موقع پر تعینات کیا گیا ہے۔
