منگلورو13؍مارچ (ایس او نیوز) کرناٹکااور کیرالہ سرحد کے پاس تلپاڈی میں نیشنل ہائی وے پرواقع پٹرول کے قریب پارک کیے گئے گیس ٹینکر سے اچانک گیس اخراج شروع ہونے پر علاقے خوف و ہراس پھیل گیا اور احتیاطی طور پر اس علاقے میں موٹر گاڑیوں کی آمد و رفت کو روک دیا گیا۔

بتایاجاتا ہے کہ یہ گیس ٹینکر منگلورو سے کاسرگوڈ کی طرف روانہ ہواتھا۔ عینی شاہدین کے مطابق گیس ٹینکر کے اوپری حصے سے گیس کا اخراجا اس طرح شروع ہوا جیسے فضا میں اسپرے کیا جارہا ہو۔اطلاع ملتے ہی پولیس کی ٹیم اور فائر بریگیڈ کا عملہ موقع پر پہنچ گیا اور حالات پر قابو پانے کی تدابیر میں مصروف ہوگیا ۔ منگلورو کی طرف آنے والی اور کاسرگوڈ کی طرف جانے والی ٹریفک کا رخ دوسری طرف موڑنے کے علاوہ گیس ٹینکر میں دھماکہ ہونے کا خدشہ محسوس کرتے ہوئے تقریباً دو کیلو میٹر تک بسنے والے افراد کو چوکنّا کردیا گیا ۔کسی بھی بڑے المیہ کو ٹالنے کے لئے اس علاقے میں بجلی کی سپلائی کاٹ دی گئی ہے اور تمام دکانیں اور دفاتر کو بندر کھنے کی تاکید کی گئی ہے۔