مینگلور کے قریب گیس ٹینکر الٹ گیا؛ گیس کے اخراج سے عوام میں دہشت؛ علاقے کے مکانات خالی کروائے گئے
منگلورو2؍دسمبر (ایس او نیوز) منگلورو بنگلورو نیشنل ہائی وے پر اپن انگڈی کے قریب آدھی رات کو ایل پی جی گیس ٹینکر بے قابو ہوکر الٹ جانے اور ٹینکر سے گیس خارج ہونے کی وجہ سے علاقے میں دہشت کا ماحول پید ا ہوگیا۔ مگر راتوں رات اطراف کے علاقوں کے لوگوں کو محفوظ مقامات پر پہنچانے کے ساتھ ساتھ حفاظتی انتظامات بھی کئے گئے۔
حادثہ رات قریب 2بجے بیدروڈی کراس پراس وقت پیش آیا جب گیس سے بھرا ہو اٹینکر منگلورو سے بنگلورو جانے کے دوران ایک موڑ پر اُلٹ گیا۔
حادثے کی اطلاع ملتے ہی پولیس اور فائر بریگیڈ عملہ جائے وقوع پر پہنچ گیا۔اور علاقے کے مکانات میں رہنے والوں کو محفوظ مقام پر منتقل کردیا گیا۔ اس کے علاوہ جائے حادثہ سے 2کیلو میٹر تک کے علاقے میں لوگوں کو آگ نہ جلانے کی ہدایت جاری کردی گئی ۔
پولس نے فوری طور پر سڑک کے بیچ الٹ کر گرنے والے ٹینکر میں موجود گیس خالی کرنے کے لئے تین اضافی ٹینکر بھی طلب کرلیے۔معلوم ہوا ہے کہ نیشنل ہائی وے پر حادثے والے علاقے میں موٹر گاڑیوں کی آمد و رفت روک دی گئی اور دوسرے راستوں سے ٹریفک کو موڑ دیا گیا ۔
