منگلورو 23/اگست (ایس او نیوز)منجا ناڈی علاقے کے رہنے والے محمد عارف (26) نامی شخص کو کسی گینگ کے ذریعے اغوا کرنے اور اس کی رہائی کے لئے 1.5کروڑ روپے کا تاوان طلب کرنے کا معاملہ تاخیر سے سامنے آیا ہے۔

موصولہ تفصیلات کے مطابق محمد عارف کے ایک رشتے دار عبدالرحمن نے پولیس میں شکایت درج کرتے ہوئے بتایاہے کہ عارف خلیجی ملک میں کئی برسوں تک ملازمت کے بعد گزشتہ سال ہی واپس آیا تھا۔ اور روزانہ صبح 4.30 بجے پورٹ میں واقع ڈاکیا رڈ (گودی) میں جایاکرتا تھا۔11/اگست کوعلی الصبح عارف کے گھر کے پاس ایک کالی کار دیکھی گئی جو بڑی تیز رفتاری سے اس علاقے سے گزر گئی۔ گمان غالب ہے کہ شاید اسی کار میں عارف کو اغوا کرکے لے جایا گیا ہے۔

بتایا جاتا ہے کہ ایک بیرونی ملک کے نمبر سے بار بار عارف کے گھر پر کسی ایرانی نامی شخص کے فون کالس آرہے ہیں جس میں عارف کی رہائی کے لئے دیڑھ کروڑ روپے کامطالبہ کیا جارہا ہے۔ کوناجے سرکل پولیس انسپکٹر کا کہنا ہے کہ پولیس اس کیس کی تحقیقات میں لگی ہوئی ہے۔اور کچھ سراغ بھی اس کے ہاتھ لگے ہیں۔ اس ضمن میں بیکال نامی علاقے میں ایک گھر پر پولیس نے چھاپہ بھی مارا تھا۔ لوگوں کو شک ہے کہ شاید عارف کی طرف سے کسی کو بھاری رقم واجب الادا ہے، اس لئے ان لوگوں نے اپنی رقم وصول کرنے کے لئے اسے اغوا کرلیا ہے۔