بنگلورو میں 27،29 اگست 2اور3ستمبر کو گنیش جلوس،جلوس کے منتظمین کی طرف سے مسلمانوں سے تعاون کی اپیل
بنگلورو،23؍ اگست(ایس او نیوز) بنگلورو میں گنیش تہوار کی مناسبت سے 27،29 اگست اور 2اور3ستمبر کوبہت بڑے بڑے جلوس نکالے جارہے ہیں ، جس کیلئے پولیس کی طرف سے غیر معمولی حفاظتی انتظامات کا فیصلہ کیاگیا ہے۔ آج ان جلوس کے منتظمین نے اپنی تیاریوں کا اعلان کرتے ہوئے شہر کے مسلمانوں سے اپیل کی ہے کہ اس جلوس کے اہتمام میں تعاون کریں اور گنیش تہوار میں بھائی چارگی کے طور پر شرکت کریں۔ آج اس سلسلے میں ایک اخباری کانفرنس سے مخاطب کرتے ہوئے گنیش جلوس کے منتظمین نے بتایاکہ برہت بنگلور مہانگر پالیکے کی حدود میں آنے والے 18اسمبلی حلقوں میں 27 اور29 اگست اور2اور 3 ستمبر کو جلوس نکالے جائیں گے۔ گنیش سمیتیوں کے صدر شنکرپا نے بتایاکہ شہر بھر میں جملہ 20 عوامی جلوس نکالے جائیں گے۔ کرشنا راجپورم ، مہادیو پورہ، بی ٹی ایم ، چک پیٹ ، وجئے نگر، مہا لکشمی لے آؤٹ، داسر ہلی ، یلہنکا ، بیاٹرائن پورہ، ہبال ، پلکیشی نگر، سروگنا نگر ، شیواجی نگر ، سی وی رامن نگر ، مہالکشمی لے آؤٹ ، شانتی نگر ، گاندھی نگر ،چک پیٹ ، وجئے نگر ، داسر ہلی وغیرہ حلقوں میں یہ جلوس نکلے گا۔ پچھلے چار سال سے مقامی لوگوں کے بھرپور تعاون کے ساتھ یہ جلوس نکل رہاہے۔ انہوں نے کہاکہ گنیش تہوار کی وجہ سے مسلمانوں کی طر ف سے بقر عید کے اہتمام میں کسی طرح کی رکاوٹ نہ آئے اس کا خاص طور پر خیال رکھا جائے گا۔ ساتھ ہی مسلمانوں سے انہوں نے اپیل کی کہ شہر بھر میں گنیش جلوس کے اہتمام میں وہ اپنی طرف سے بھی تعاون پیش کریں۔