گیل نے ملز کو بتایا میچ فاتح کھلاڑی،کوہلی کے جلدلوٹنے کی امیدظاہرکی
نئی دہلی،3اپریل(ایس او نیوز/آئی این ایس انڈیا)رائل چیلنجرز بنگلور (آرسی بی) کے اوپنر بلے باز کرس گیل نے کہا ہے کہ نئے کھلاڑی ٹامل ملز میچ فاتح کھلاڑی ہیں اور ان کے آنے سے ٹیم کے خطاب جیتنے کی امیدیں بڑھ گئی ہیں۔ آرسی بی نے اس بار انگلینڈ کے ملز کو 12 کروڑ روپے میں خریدا ہے۔گیل کا خیال ہے کہ ملز آسٹریلیا کے مچل سٹارک کی غیر موجودگی میں ٹیم کے بولنگ اٹیک کی کمان سنبھالیں گے۔ ملز کے علاوہ بنگلور کے پاس آسٹریلیا کے بل ا سٹان لیک، نیوزی لینڈ کے ایڈم ملنے، ہندوستان کے سری ناتھ اروند کے علاوہ آل راؤنڈر کھلاڑی شین واٹسن، مقامی اسٹیورٹ بنی ہیں۔ گیل نے کہاکہ ہماری ٹیم میں اچھا مجموعہ اور توازن ہے۔انہوں نے کہا کہ ملز نے جب سے بین الاقوامی کرکٹ میں قدم رکھا ہے وہ اس کے بعد سے ہر جگہ اچھا مظاہرہ کر رہے ہیں، امید ہے کہ وہ اس بار بولنگ اٹیک کی کمان سنبھالیں گے، ٹیم میں کچھ نوجوان کھلاڑی بھی ہیں، مجھے امید ہے کہ وہ اس ٹیم میں فٹ بیٹھیں گے۔انہوں نے کہا کہ ہمارے پاس وراٹ کوہلی جیسا ماہر کپتان ہے، ساتھ ہی کئی سینئر کھلاڑی بھی ہیں جو نوجوان کھلاڑیوں کا اچھا ساتھ دیں گے۔انہوں نے کہاکہ ہم اپنی پوری کوشش کریں گے یہی ہمارا مقصد ہے، ہم چھوٹے چھوٹے ہدف بنا کر آگے بڑھیں گے، ہم اس بار ٹرافی جیتنا چاہتے ہیں۔
کوہلی کے کندھے میں چوٹ ہے اور اس وجہ سے وہ آئی پی ایل کے ابتدائی دور میں نہیں کھیلیں گے۔ گیل نے اس پر کہا کہ ہاں یہ ہمارے لئے مایوس کن اور برا ہے، کوئی بھی کھلاڑی میچ چھوڑنا نہیں چاہتا،یہ بد قسمتی ہے، میں نہیں جانتا کہ ان کی موجودہ صورت حال کیا ہے،ہم صرف ان کا انتظار کر سکتے ہیں۔کوہلی کو آسٹریلیا کے خلاف تیسرے ٹیسٹ میچ میں فیلڈنگ کے دوران چوٹ لگ گئی تھی اور اسی وجہ سے وہ چوتھا ٹیسٹ میچ نہیں کھیلے تھے۔ آئی پی ایل میں ان کو لے کر بی سی سی آئی نے کوہلی کی پوزیشن واضح کی تھی۔ کوہلی کی غیر موجودگی میں ٹیم پر کیا اثر پڑے گا اس پر گیل نے کہا کہ کس نے کہا وہ نہیں ہوں گے؟ وہ ہوں گے۔کوہلی کے علاوہ بنگلور اوپنر لوکیش راہل بھی زخمی ہو کر آئی پی ایل سے باہر ہو گئے ہیں۔ گیل نے راہل کوہندوستان کا اہم کھلاڑی قرار دیتے ہوئے کہا کہ ان کا مستقبل روشن ہے، انہیں کوئی نہیں روک سکتا، صرف وہ خود اپنے کو روک سکتے ہیں۔