ناگپور،26 مارچ (ایس او نیوز؍آئی این ایس انڈیا)مرکزی وزیر نتن گڈکری نے ناگپور پارلیمانی سیٹ کے لئے داخل کئے گئے  پرچہ نامزدگی کے ساتھ اپنے  حلف نامہ  میں اپنے پاس  25.12 کروڑ روپے کی منقولہ اور غیر منقولہ جائیدادہونے  کا اعلان کیا ہے۔گڈکری نے پیر کو ناگپور لوک سبھا سیٹ کے لئے اپنی پرچہ نامزدگی داخل کی ۔جہاں 11 اپریل کو ووٹنگ ہوگی۔

ان کے ٹیکس ریٹرن فارم کے مطابق سال 2013-14میں ان کی کل آمدنی 2,66,390روپے اور 2017-18میں 6,40,700روپے رہی۔حلف نامے کے مطابق ان کے پاس69,38,691روپے کی منقولہ جائیداد جبکہ ان کی بیوی کے پاس 91,99,160روپے کی منقولہ جائیداد ہے۔ ایچ یو ایف کے نام پر کل66,07,924روپے کی جائیداد گڈکری کے پاس ہے۔اسی طرح گڈکری کے پاس 6,95,98,325روپے اور ان کی بیوی کے پاس 6,48,60,325روپے کی غیر منقولہ جائیدادہے۔

ایچ ایو ایف کے نام پر ان کی کل 9,40,31,224روپے کی جائیداد ہے۔گڈکری نے ناگپور کے دھپیواڈا میں 29 ایکڑ کی زرعی زمین اپنے پاس ہونے کا اعلان کیا ہے جس میں سے 15 ایکڑ ان کی بیوی کے نام پر اور 14.60 ایکڑ ایچ یو ایف کے نام پر رجسٹرڈ ہے۔گڈکری نے مہال (ناگپور) میں ایک آبائی مکان اور ورلی (ممبئی) میں ایک ایم ایل اے سوسائٹی میں ایک فلیٹ ہونے کا اعلان کیا ہے۔مرکزی وزیر نے اپنے حلف نامے میں بتایا کہ انہوں نے بچت کی منصوبہ بندی، مشترکہ فنڈ، بانڈ اور حصص میں 3,55,510روپے سرمایہ کاری کی ہے۔ حلف نامے کے مطابق ان کے بینک اکاؤنٹ میں 8,99,111روپے ہیں۔ان کی بیوی کے بینک اکاؤنٹ میں 11,07,909روپے ہیں۔سینئر بی جے پی لیڈر پر بینک کا 1,57,21,753 روپے کا قرضہ بھی ہے۔گڈکری نے اپنے پاس  چھ کاریں ہونے کا بھی اعلان کیا ہے جن میں سے چار ان کی بیوی کے نام پر ہیں۔