کابینہ میں توسیع پر تبادلۂ خیال کے لئے پرمیشور دہلی روانہ
بنگلورو،23؍اگست(ایس او نیوز) کانگریس جنتادل (ایس) مخلوط حکومت کی رابطہ کمیٹی کے لئے کانگریس اور جنتادل (ایس) کے دوممبروں کے تقرر اور دیگر امور پر تبادلۂ خیال کے لئے نائب وزیراعلیٰ ڈاکٹر جی پرمیشور آج دہلی روانہ ہوئے۔
اپنی روانگی سے قبل اخباری نمائندوں سے بات چیت کرتے ہوئے انہوں نے کہاکہ کے پی سی سی صدر دنیش گنڈو راؤ کورابطہ کمیٹی کا ممبر مقرر کرنے کا پارٹی کے سینئر رہنماؤں نے فیصلہ کیا ہے، اسی لئے جنتادل (ایس) سے کسی کو رابطہ کمیٹی میں مقرر کرنے کا بھی فیصلہ لیا جائے گا۔
انہوں نے کہاکہ عموماً کے پی سی سی صدر کو مقرر کرنے پر جنتادل (ایس) کی طرف سے بھی اس پارٹی کے صدر کو مقرر کیا جانا چاہئے، لیکن ان کی بجائے اگر کسی سینئر رہنما کو مقرر کیاجاتاہے تو بھی کانگریس کو کوئی اعتراض نہیں ہے۔
اس موقع پر ڈاکٹر پرمیشور نے ریاستی حکومت کی طرف سے کنڑا فلم انڈسری کی ترقی کے لئے ہر ممکن مدد کا تیقن دیا اور کہاکہ کنڑا فلم انڈسٹری کو نئے شعبوں کی طرف رخ کرکے ترقی حاصل کرنی چاہئے۔ اس موقع پر کنڑا فلم چیمبر آف کامرس کے چیرمین چننے گوڈا اور دیگر نے بھی فلم انڈسٹری کی ترقی کے متعلق نائب وزیر اعلیٰ کے خیالات سے اتفاق کیا۔