بنگلورو،17؍جون(ایس او  نیوز) مشہور مفکر پروفیسر جے کے گوند راؤ نے کہا کہ آزادی حاصل ہونے کے بعد ذات پات اور فرقہ پرستی مٹنے اور ختم ہونے کے بجائے مزید اضافہ کے ساتھ ابلنے لگی ہے ۔ شہر کے کنڑا بھون نائنا آڈیٹوریم میں بسوا ،امبیڈکر جینتی کے تحت دلت سنگھرش سمیتی ( ڈی ایس ایس)کے زیر اہتمام فرقہ پرستی مخالف دن کے مباحثہ میں شرکت کرتے ہوئے پروفیسر جے کے گووند راؤ نے کہا کہ وزیر اعظم نریندر مودی اقتدار اسی مقصد سے حاصل کیا ہے کہ وہ ملک کو ہندوتوا بنا سکیں اور ملک کو سیکولر ملک کے بجائے ہندو ملک کے طور پر پیش کرسکیں۔ انہوں نے کہا کہ بی جے پی کا خود ایک الگ خفیہ ایجنڈا ہے جس کے تحت وہ آر ایس ایس اور سنگھ پریوار کے اشاروں پرچلتے ہوئے ملک کو ہندوتوا میں تبدیل کرنے کی کوشش کرنے لگی ہے۔ انہوں نے عوام سے گزارش کی کہ وہ فرقہ پرست بی جے پی کے ناپاک عزائم سے چوکنا رہیں ۔ ورنہ آنے والے دنوں میں فرقہ پرست طاقتیں ملک کو ہندوتوا کے نام پر تباہی کے دہانے لے جاسکتی ہیں اور سکیولر ذہن رکھنے والے افراد کو کافی پریشانیوں کا سامنا کرنا پڑسکتا ہے۔ انہوں نے کہا کہ عوام مخالف باتوں پر احتجاج ضروری ہے۔اگر اس طرح کا اقدام نہ کیا جائے تو نقصان خود ہمارا ہی ہوگا ۔ انتخابات کے آنے اور جانے سے فرق نہ ہونے کی ذہنیت دوبارہ مودی کو موقع فراہم کرسکتی ہے۔ انہوں نے کہا کہ مودی کے خلاف باتیں کرنے کے بجائے ہم خود اپنے آپ سے سوال کریں۔ پروفیسر گوند راؤ نے کہا کہ ذات پات اور فرقہ پرست کو اقتدار سے دور رکھنے کے مقصد سے جنتادل سکیولر اورکانگریس نے جواتحاد کیا ہے وہ کافی خوش آئند بات ہے ۔ اس کو بچائے رکھنے کے بجائے مذکورہ دونوں پارٹیوں کے اراکین اسمبلی وزارت حاصل کرنے کے لئے جولابی چلانے لگے ہیں، اس سے کافی نقصان اٹھانا پڑسکتا ہے۔انہوں نے کہا کہ ریاستی مخلوط حکومت کو بچاکر آگے لے جانے کی اشد ضرورت ہے تاکہ فرقہ پرست جماعتیں اپنے حربے میں ہر گز کامیاب نہ ہوسکیں۔اس موقع پر دیگر معزز شخصیات موجود تھیں۔