دوحہ،16؍ستمبر(ایس او نیوز؍آئی این ایس انڈیا)فرانسیسی صدر ایمانوئل ماکروں نے کہا ہے کہ خلیجی ریاست قطر پر سعودی عرب کی قیادت میں عائد کی جانے والی پابندیوں کو فوری طور پر ختم کیا جائے۔ صدر ماکروں کا یہ بیان پیرس میں قطری امیر شیخ تمیم بن حمد الثانی کے ساتھ ملاقات کے بعد جاری کیا گیا۔ ماکروں نے خطے کی سلامتی کی صورت حال پر تشویش کا اظہار کرتے ہوئے کہا کہ مشترکہ کوششوں کے ذریعے ہی دہشت گردی کے خطرے سے نجات حاصل کی جا سکتی ہے۔ سعودی عرب، مصر، بحرین اور متحدہ عرب امارات نے رواں برس پانچ جون سے قطر کے ساتھ سفارتی تعلقات منقطع کر رکھے ہیں اور یہ تنازعہ ابھی تک حل نہیں ہو سکا ہے۔