بنگلورو 10؍اکتوبر (ایس او نیوز) سطح غربت سے نچلی حد (بی پی ایل) والے راشن کارڈ کے حاملین جن کے گھروں میں رسوئی گیس (ایل پی جی) کنکشن نہیں ہے ، ان کے لئے خوشخبری یہ ہے کہ امسال دسمبر سے ریاستی سرکار کی طرف سے انہیں مفت گیس کنکشن فراہم کیا جائے گا۔
وزیر غذا یوٹی قادر کے بیان کے مطابق وزیر اعلیٰ سدا رامیا نے 'انیل بھاگیہ'اسکیم جاری کرنے کا فیصلہ کیا ہے جس کے تحت اپنے گھر میں گیس کنکشن سے محروم بی پی ایل کارڈ والوں کو ابھی سے آن لائن درخواستیں گرام پنچایت کے توسط سے داخل کرنی ہوگی۔اندازہ لگایا ہے کہ فی کنکشن 4040روپے خرچ پر ریاست کے تقریباً 15سے 20لاکھ خاندانوں کو اس اسکیم کے تحت سلینڈر اور گیس کنکش کے ساتھ ایک گیس چولھادیا جائے گا اور دو مہینے تک کے لئے گیس بھی مفت فراہم کی جائے گی۔ وزیر موصوف نے بتایا کہ مرکزی سرکار کی طرف سے 'اٰجوالا'اسکیم سے مستفیض نہ ہونے والوں کو ریاستی سرکار کی اس نئی انیل بھاگیہ اسکیم سے فائدہ ہوگاجس کا تخمینہ 1100کروڑ روپے لگایاگیا ہے۔