بنگلور:16/دسمبر (ایس او نیوز/آئی این ایس انڈیا) کرناٹک کے باگل کوٹ ضلع میں بی جے پی کے سابق وزیر مروگیش نرانی کی ایک ڈسٹلری میں اتوار کو ہوئے دھماکے میں کم از کم چار افراد کی موت ہو گئی جبکہ تین دیگر زخمی ہو گئے۔ پولیس نے کہا کہ یہ حادثہ یہاں سے شمال مغرب میں 510 کلو میٹر دور واقع مڈھوک علاقہ کے کلالی گاؤں میں نرانی صنعتی گروپ کی ڈسٹلری میں دوپہر کے وقت ہوا۔ ایسا لگتا ہے کہ دھماکہ گندے پانی صاف کرنے والے پلانٹ کی سیفٹی والو میں ہوا۔ پولیس نے کہا کہ چار لوگوں کی موت ہو گئی جبکہ تین زخمیوں کو ایک قریبی اسپتال میں داخل کرایا گیا جہاں ان کی حالت بہتر بتائی جا رہی ہے۔ اس معاملے کی جانچ چل رہی ہے۔ میڈیا سے بات کرتے ہوئے نرانی نے تصدیق کی کہ دھماکے ان کی ایک فیکٹری میں ہو اہے ۔ انہوں نے کہا کہ دھماکہ ہماری فیکٹری کے احاطے کے باہر گندے پانی صاف کرنے والے پلانٹ میں ہواہے ،گیس جمع ہونے کی وجہ سے یہ دھماکہ ہوا ہے ۔ نرانی نے کہا کہ مجھے اس واقعہ پر بے حد افسوس ہے۔ میں حادثے میں مارے گئے چار افراد کی ہلاکت پر تعزیت کا اظہار کرتا ہوں۔