سابق ریلوے وزیرجعفرشریف چل بسے۔ پیر کو ہوگی تدفین، وزیراعلیٰ کماراسوامی سمیت سرکردہ لیڈروں نے کیا آخری دیدار
بنگلور25نومبر (ایس او نیوز) ہندوستان کے سابق ریلوے وزیرسی کے جعفرشریف آج انتقال کرگئے، ان کی عمر 85 سال تھی۔ بتایا گیا ہے کہ انہیں بنگلورو کے ایک پرائیویٹ اسپتال میں علاج کے لئے داخل کیا گیا تھا، مگر وہ آج چل بسے۔ بنگلورومیں وزیراقلیتی بہبود ضمیراحمد خان نے بتایا کہ کل پیر کو بعد نماز ظہرمسجد قادریہ میں ان کی نماز جنازہ ادا کی جائے گی اور قدوس صاحب عید گاہ قبرستان میں تدفین عمل میں آئے گی۔
انتقال کی خبر ملتے ہی بنگلور میں ان کی رہائش گاہ پر سیاسی لیڈروں اورسرکردہ شخصیات کا تانتا لگ گیا جنہوں نے ان کے انتقال پر اہل خانہ کے ساتھ تعزیت کا اظہارکیا۔ کرناٹک کے وزیراعلی ایچ ڈی کمارسوامی نے اسپتال جاکر آخری دیدارکیا اور تعزیت پیش کی۔ اس کے علاوہ بی جے پی لیڈروں نے بھی جعفرشریف کا آخری دیدارکیا۔ بی جے پی کے ریاستی صدراورسابق وزیراعلیٰ بی ایس یدی یورپا، سینئرلیڈرآراشوک، اروند لمباولی نے بھی تعزیت پیش کی اورانڈین ریلوے کی ترقی کیلئے جعفرشریف کی خدمات کا اعتراف کیا۔
سی کے جعفرشریف کرناٹک کی سیاست میں کانگریس کا اہم چہرہ رہے ہیں، کیونکہ وہ طویل وقت سے کانگریس سے منسلک رہے ہیں۔ کانگریس کے دوراقتدارمیں 1991 سے 1995 تک وہ ریلوے وزیر بھی رہے ہیں۔
پی وی نرسمہا راو کی حکومت میں انہیں وزارت ریل کی ذمہ داری دی گئی تھی۔ 21 جون 1991 سے 16 اکتوبر1995 تک انہوں نے وزیرریل کی ذمہ داری سنبھالی تھی۔ جعفرشریف کی پیدائش 3 نومبر1933 کو ہوئی تھی۔ وہ طویل وقت تک کانگریس سے وابستہ رہے۔
واضح رہے کہ گذشتہ جمعہ کو سی کے جعفر شریف کی طبیعت اُس وقت خراب ہوگئی تھی جب وہ نماز جمعہ کی تیاری کررہے تھے ، جب وہ بیہوش ہوگئے تو فوراً ان کے پوتے وہاب شریف اوررحمن شریف نے انہیں اسپتال پہنچایا ۔ ڈاکٹروں کی ٹیم نے ان کی تشخیص کرنے کے بعد انکشاف کیا کہ انہیں دل کا دورہ پڑا ہے۔ تاہم آج وہ دنیا سے رخصت ہوگئے۔
