معروف خلائی سائنسدان پروفیسر یو آر راؤ چل بسے
بنگلورو،24؍ جولائی(ایس او نیوز) ملک کے معروف خلائی سائنسدان اور اسرو کے سابق چیرمین پروفیسر یو آر راؤ آج چل بسے ۔ 81 سالہ یو آر راؤ انڈین اسپیس ریسرچ آرگنائزیشن میں بطور خلائی سائنسدان کافی طویل تجربہ رکھتے تھے۔ سابق صدر ہند ڈاکٹر اے پی جے عبدالکلام مرحوم کے قریبی ساتھیوں میں شمار کئے جانے والے ڈاکٹر یو آر راؤ نے ہندوستان کے خلائی نظام کو بین الاقوامی شہرت سے ہمکنار کرنے اور ملک کی سیٹلائٹ اور میزائل ٹیکنالوجی کو غیر معمولی ترقی سے ہمکنار کرنے کیلئے کام کیا ہے۔ پروفیسر یو آر راؤ کی موت پر وزیراعظم نریندر مودی ، صدر کانگریس سونیا گاندھی ، وزیر اعلیٰ سدرامیا ، اسرو کے چیرمین کرن کمار اور دیگر اہم شخصیتوں نے اپنے گہرے صدمے کا اظہار کیا۔ اڈپی ضلع سے تعلق رکھنے والے اڈپی رامچندرا راؤ نے اپنی آخری سانس تک خود کو اسرو سے وابستہ رکھا اور ملک کی خلائی ٹیکنالوجی کو اپنی خدمات دیتے رہے۔ ہندوستان کی طرف سے تیار شدہ ریموٹ سنسنگ اور دیگر مصنوعی سیاروں کی تیاری میں ان کا کردار کلیدی رہا۔