نئی دہلی ،16؍ اکتوبر (ایس او نیوز؍آئی این ایس انڈیا) دہلی کے پانچ ستارہ ہوٹل حیات میں ایک شخص نے سرعام غنڈہ گردی کی۔پستول لے کر لڑکی اور اس کے دوست کودھمکاتے ہوئے اس کا ویڈیو وائرل ہوا۔ملزم یوپی کے امبیڈکر نگر سے بی ایس پی کے سابق ممبر پارلیمنٹ راکیش پانڈے کابیٹاہے۔اس دوران بی ایس پی بھی اس مسئلے سے دوری اختیار کرتے نظر آرہی ہے۔بی ایس پی کے سینئر لیڈرسدھیندربھدور یا نے کہا کہ پارٹی کا اس سے کوئی لینا دینا نہیں ہے۔معاملے کی مکمل جانچ پڑتال کرنی چاہیے اورکارروائی کرنی چاہیے ۔اس معاملے کا پارٹی سے کوئی لینا دینا نہیں ہے۔بتا دیں کہ راکیش پانڈے کے خلاف بھی بہت مجرمانہ معاملے درج ہیں۔ویڈیو وائرل ہونے کے بعد آر کے پورم تھانے ایف آئی آر درج کی گئی ہے۔وہیں ملزم کی تلاش کے لئے دہلی پولیس کی دو ٹیمیں بھی لکھنؤ بھیجی گئی ہیں۔بتا دیں کہ ملزم اشیش پانڈے پانچ ستارہ ہوٹل کے خواتین کے بیت الخلا میں گھس گیا تھا۔نشے میں مدہوش ملزم کا جب ایک لڑکی نے مخالفت کی تو اس سے جھگڑا کرنے لگا۔اسکے بعد باہر نکل کر اس نے پستول نکال لی اور پھر لڑکی سے بدسلوکی کرکے اس کے بوائے فرنڈ کو دھمکاتے ہوئے نکل گیا۔سرعام پستول لے کر لڑکی کودھمکاتا رہا، مگر پانچ ستارہ ہوٹل کے سیکورٹی تماش بین بنے رہے۔وائرل ویڈیو میں صاف دکھائی دے رہا ہے کہ کس طرح ایک رئیس زادہ سرعام ہاتھ میں پستول لئے راجدھانی دہلی میں قانون کی دھجیاں اڑا رہا ہے۔وائرل ویڈیو میں صاف دکھ رہا ہے کی کس طرح یہ شخص ہاتھ میں پستول لئے ہوئے ہوٹل کے مین گیٹ پر ایک جوڑے کو دھمکا رہا ہے، اس شخص نے نہ صرف اس جوڑے کو پستول کی نوک پر دھمکایا، بلکہ ان کے ساتھ بدسلوکی ،گالی گلوج بھی کیا۔تبھی کچھ لوگوں کے بچاؤ کے بعد یہ شخص اپنی گاڑی میں واپس آکر بیٹھ گیا، لیکن اس کے بعد بھی اس کا غصہ ٹھنڈا نہیں ہوا، یہ شخص اس جوڑے کو نہ صرف گندی گلیاں دیتا رہا بلکہ اگلے دن دیکھ لینے کی دھمکی بھی دی۔